Իրականությունից կտրված Կաթողիկոսը

Ժողովրդավար երկիրը պետք է ունենա սիրված Հայրապետ, ինչը հասարակական պահանջ է:  ԼՈւՐԵՐ.com-ի թղթակցի հետ զրույցում նման տեսակետ հայտնեց տնտեսագիտական գիտությունների թեկնածու, Տնտեսագիտական համալսարանի դասախոս Արտակ Ալավերդյանը՝ անդրադառնալով «Նոր Հայաստան, նոր Հայրապետ» ազգային-եկեղեցական շարժման անդամների պահանջին, այն է՝ Գարեգին Բ կաթողիկոսի հրաժարականը և կաթողիկոսական նոր ընտրությունների անցկացումը։

«Ինձ համար ամեն բան հայտնի դարձավ, երբ օրեր առաջ հանդիպեցինք Կաթողիկոսի հետ: Ես հակացա, որ Վեհափառի դեմ պայքարը անհրաժեշտ է, քանի որ կան մի շարք պատճառներ: Ես տեսա՝ այնտեղ ձևավորվել է ավտորիտար ռեժիմ, կլան և կռապաշտ համակարգ՝ անձի շուրջ: Խոսակցություններին, թե նա կուսակրոնության ուխտի դրժում է արել, երեխա ունի, թե բիզնեսներ ունի, այս ամենի մասին մշտապես խոսվել է, սակայն ինձ համար ամենակարևորն է՝ ժողովրդավար երկիրը չպետք է ունենան հոգևոր առաջնորդ, ում ժողովուրդը պարզապես չի սիրում: Նրա օժանդակությունը, Հայրապետի շունչը ոչ ոք երբևէ չի զգացել քաղաքական պրոցեսների ժամանակ, երբ ժողովուրդն ընբոստացել է: 20 տարվա մեջ ինքն ընդամենը մեկ անգամ է որպես Հայրապետ գնացել ուխտի Գյումրիում: 75 հոգու կարգալույծ է արել, որը պատմության մեջ աննախադեպ երևույթ է: Իր հետ հանդիպման ժամանակ բարձրացված հարցերի գրեթե 90 %-ի ժամանակ Վեհափառը լռեց: Մենք արձանագրեցինք, որ Կաթողիկոսը իրականությունից կտրված է: Ես իրեն ասացի՝ ինչպես Սերժ Սարգսյանը խիզախություն ունեցավ և հրաժարական տվեց, նույնն էլ Դուք արեք»,- ասաց Ալավերդյանը: 

Նրա խոսքով՝ այսօր ունենք ազգային պառակտում, կապ չկա եկեղեցու հետ, իսկ պատճառն անվստահությունն է: Կաթողիկոսի անձի հետ կապված խոսակցությունները վերագրվում են եկեղեցուն, ինչն, ըստ մեր զրուցակցի՝ սխալ է:

«Չենք կարող ունենալ լեգիտիմ իշխանություն՝ ժողովրդավարական հիմունքների վրա ստեղծված և ունենալ մի կառույց, որտեղ գործում է դիկտատուրա: Մենք երբեք տեղյակ չենք եղել՝ ինչ է կատարվում եկեղեցում, ուր են գնում նվիրատվութունները: Երբ ամբողջ պետական համակարգն է այդպիսին՝ այդ դեպքում համահունչ է, իսկ երբ այն փոխվում է, ժողովրդավարություն է հաստատվում՝ մի տեսակ այն չի ստացվում. կարծեք պետության մեջ մեկ այլ պետություն, որը մեզ բարդ պրոցեսների առաջ է կանգնեցնելու և ազգային անվտանգության խնդիր ենք ունենալու»,- նշեց նա:

Նշենք, որ այսօր մամուլը գրեց, թե Կաթողիկոսին դեմ դուրս եկած շարժման ետևում Նավասարդ Կճոյանն է կանգնած: Սակայն Ալավերդյանը մեզ հետ զրույցում հերքեց դա. «Մենք պաշտպանելու ենք այն թեկնածուին, ով կլինի ժողովրդի կողմից սիրված, հասարակ, ով կմտնի գյուղեր, կշփվի քաղաքացիների հետ և ով կվարի թափանցիկ քաղաքականություն, ինչպես նաև որևէ կոռումպացված անցյալ չունեցող անձ: Որքանով տեղյակ եմ՝ հակամարտություն կա Կաթողիկոսի և Կճոյանի միջև և սրանով, կարծում եմ՝ ուզում են և՛ մեզ վնասել, և՛ Կճոյանին: Ես հավաստիացնում եմ՝ մենք ոչ ոքի հետ կապ չունենք»:  

Ալավերդյանը նշեց՝ իրենց դեմ դուրս եկածները փորձում են ապացուցել, որ ՀՀԿ-ական սիստեմը դեռ մնացել է. «Սուրբ Գրիգոր Լուավորիչում օրեր առաջ տեղի ունեցած միջադեպի ժամանակ եղել են քաղաքացիական հագուստով սարկավագներ, ինչպես ժամանակին ոստիկաններն էին անում: Մեր երկրում մի շատ կարևոր ինստիտուտ նույնն է մնացել, այնինչ հենց իրենք պետք է լինեն քաղաքացիներին պաշտպանողը»,- ասաց նա՝ ընդգծելով, որ նույն գործիքակազմն են օգտագործում, ինչ ժամանակին ընդդիմադիրների դեմ՝ իշխանավորները:

 Սոնա Հարությունյան