Չարենցը հայ ժողովդի երգիչն էր. Երևանում Եղիշե Չարենցի մեծարման երեկո անցկացվեց

 Կապույտ մզկիթի պահպանման գործում մեծ դերակատարություն ունեցած մեծանուն գրող Եղիշե Չարենցին երախտագիտություն հայտնելու նպատակով Հայաստանում Իրանի Իսլամական Հանրապետության դեսպանության մշակույթի կենտրոնի նախաձեռնությամբ գրողի մեծարման երեկո անցկացվեց: Միջոցառումը տեղի ունեցավ հունիսի 19-ին Կապույտ մզկիթի բակում:

«Իմանալով, որ Եղիշե Չարենցը մեծ ծառայություն է մատուցել Կապույտ մզկիթի պահպանության հարցում, մտածեցի, որ անպայման անհրաժեշտ է նրան նվիրված երեկո կազմակերպել՝ համագործակցելով Հայաստանի տարբեր մշակութային և գիտական կենտրոնների հետ», նշեց Իրանի Իսլամական Հանրապետության դեսպանատան մշակույթի հարցերով  խորհրդական Սեյյեդ Մոհամմադ Ռեզա Հեյդարին:

Նա ընդգծեց, որ Իրանում հրատարակվել է հայ բանաստեղծների ստեղծագործությունների թարգմանված ընտրանի, որում ներառված են նաև Չարենցի գործերը: «Չարենցին սիրում և հարգում են մեր երկրում՝ չմոռանալով, որ նա արել է հնարավորը  Հայաստանում մզկիթը պահպանելու համար»,-ասաց Հեյդարին:

Մայր Աթոռի արտաքին հարաբերությունների եւ արարողակարգի բաժնի պետ տեր Նաթան արքեպիսկոպոս Հովհաննիսյանի խոսքով՝ և՛ գրագետ, և՛ կիսագրագետ, և՛ անգամ անգրագետ մարդիկ Հայաստանում գիտեն Եղիշե Չարենցի անունը: «Միայն «Ես իմ անուշ Հայաստանի» բանաստեղծությունը բավարար էր, որ Չարենցը լիներ ժողովրդի երգիչ: Նա հայ դեկադանսի շրջանի մեծագույն դեմքերից դարձավ: Չարենցի նույնիսկ այն բանաստեղծությունները, որոնք այսօր կարող ենք համարել կոմունիստական շրջանին տուրք տրված, միևնույն է հանճարեղ են»,-շեշտեց նա:

Միջոցառմանը զեկույցներով հանդես եկան մի շարք հյուրեր, իրականացվեցին չարենցյան ընթերցումներ:

Միջոցառմանը Եղիշե Չարենցի թոռնուհի Գոհար Չարենցը գրողի գորգը նվիրեց մզկիթին:

Գրեթե 300 տարի առաջ Հուսեյն Ալի Խանի պատվերով կառուցված 7000 քմ ընդհանուր մակերեսով Երևանի Կապույտ մզկիթը Խորհրդային միության տարիներին ոչնչացման եզրին է եղել, սակայն մի շարք հայ մտավորականներ, որոնց թվում էր նաև Եղիշե Չարենցը, դեմ  դուրս եկան այդ մտադրությանը և արեցին ամեն հնարավորը մզկիթը պահպանելու համար: Դա նրանց հաջողվեց:

Միջոցառումն իրականացրեց Հայաստանում Իրանի Իսլամական Հանրապետության դեսպանության մշակույթի կենտրոնը՝ Երևանի պետական համալսարանի իրանագիտության ամբիոնի, ՀՀ ԳԱԱ Մանուկ Աբեղյանի անվան գրականության ինստիտուտի, ՀՀ գրողների միության և Եղիշե Չարենցի տուն-թանգարանի հետ համատեղ: