Սերժ Սարգսյանի շուրջ օղակը սեղմվում է

Վերլուծական 20 Հունիս, 2018 18:00

Ոստիկանության կազմակերպված հանցավորության դեմ պայքարի (6-րդ) գլխավոր վարչության մեծ թվով ծառայողներ շրջափակել են «Սեքյուրիթի Դրիմ» ընկերության շենքը: Ընկերությունը պետռեգիստրում գրանցված է Գուրգեն Մուշեղի Զաքարյանի եւ Ալեքսան Մուշեղի Զաքարյանի անունով: Զաքարյան եղբայրները հայտնի են որպես անվտանգության համակարգեր ներկրող «Էլլիպս» ընկերության սեփականատերեր: Ի դեպ, 2010 թվականին, ԱԺ նիստերի դահլիճի կապիտալ վերանորոգման ժամանակ հենց «Էլլիպս» ընկերությանն էր վստահվել տեխնիկական վերազինման աշխատանքները: Արագաչափերով և տեսանկարահանող սարքերով արձանագրված խախտումներից գանձված գումարների 70%-ը փոխանցվում է «Սեքյուրիթի Դրիմ» ՍՊԸ-ին, որի իսկական սեփականատերը, ըստ մամուլի հրապարակումների, Սերժ Սարգսյանի եղբայր Սաշիկ Սարգսյանն է:

Արագաչափերը իհարկե ավելացրել են կոռուպցիան, նաև այս միջոցը մարդկանց ֆինանսապես քամելու հերթական ձևն էր, որի դեմ նոր իշխանությունները փորձում են պայքարել: Սակայն Սերժ Սարգսյանի եղբոր ընկերություն իրավապահ մարմինների մուտք գործելը որևէ կերպ չես անվանի պրիմիտիվ վենդետա, կամ հասարակությանը պատկան մարմինների վճռականությունը կամ սկզբունքայնությունը ապացուցելու փորձ: Հայաստանում անգամ դպրոցական տարիքի երեխաներն են տեղյակ Սերժ Սարգսյանի եղբոր «փայ մտնելու մեծ սիրո, տարատեսակ բիզնես մախինացիաների մասին: Եթե ապացուցվի, որ արագաչափերի մեջ ևս միլիոններ են «կերել», որևէ մեկը չի զարմանա: Սակայն իրավապահ մարմինների այս քայլը պետք է դիտարկել լայնամասշտաբ կոռուպցիոն շղթայի բացահայտման համատեքստում և այդ շղթան այսօր ընդհուպ մոտեցել է նախկին վարչապետ Սարգսյանի մերձավոր շրջանակներին:

Բանն այն է, որ թեև առանց Սարգսյանի իմացության ճանճն անգամ պատուհանից ներս չէր մտնի, նրան հաջողվել է իրեն բյուրեղային մաքրություն ապահովել՝ համենայն դեպս՝ առերևույթ: Անգամ Մարտի 1-ի վերաբացված գործով Սարգսյանի ներգրավումը քիչ հավանական է, նա շատ լավ է «ծայրերը ջրում թաքցրել»: Այս տեսանկյունից Սերժ Սարգսյանի անմիջական և ամենամերձավոր շրջապատն անհամեմատ ավելի խոցելի է:

Ճակատագրի դաժան կատակ է թե ոչ, սակայն հենց ժամանակին Սերժ Սարգսյանի կողմից՝ իր մտերիմ շրջանակների կոծկված ապօրինություններն են այսօր ջրի երես դուրս գալով սեղմում օղակը՝ հենց իր շուրջ: Սպասենք նոր զարգացումների…