Սերժ Սարգսյան -Կարեն Կարապետյան պարտիան ավարտվե՞ց

Վերլուծական 25 Հունիս, 2018 18:25

Օրերս մամուլում տեղեկատվություն տարածվեց, որ հինգշաբթի օրը կայացած ՀՀԿ ԳՄ նիստի ժամանակ նախկին վարչապետ Կարեն Կարապետյանը հրաժարվել է կուսակցության առաջին փոխնախագահի պաշտոնից, եւ նրա այդ հայտարարությունն ընդունվել է ի գիտությւուն: Չի բացառվում նաեւ, որ առաջիկայում հայտնի դառնա նաեւ նրա` առհասարակ ՀՀԿ-ից դուրս գալու որոշման մասին:

Թավշյա հեղափոխության ամենաթեժ օրերին խոսվում էր այն մասին, որ ՀՀԿ ղեկավարության վերին էշելոնը պետք է փոփոխության ենթարկվի: Հայտարարարվում էր՝ ընդհուպ մինչև Սերժ Սարգսյանի կողմից ՀՀԿ ղեկավարի պաշտոնը լքելու մասին: ՀՀԿ-ի հնաբնակները Հայաստանի վարչապետի թեկնածուի պաշտոնում ցանկանում էին առաջադրել վարչապետի պաշտոնակատար Կարեն Կարապետյանին և կարծես թե սկզբնական փուլում Սերժ Սարգսյանը դրան դեմ չէր: Այնուհետև նույն ՀՀԿ-ում լուրջ կասկածներ առաջացան, որ օրվա իշխանությունների դեմ պայքարին այսպես ասած «գազավիկների» միանալը բնավ էլ պատահական չէր և ուղղորդված էր համապատասխան կենտրոնից: Ըստ հանրապետականների՝ հենց Կարեն Կարապետյանն է «Գազպրոմի» փողերով սաղմնային փուլում գտնվող ընդդիմադիր շարժումը ֆինանսավորել և հասցրել այս մակարդակի:

Թեև նման համաձայնության փաստացի ապացույցներ չկան, սակայն Սարգսյանը կարծես թե փոխեց որոշումը՝ նպատակ ունենալով կուսակցության ղեկը պահել իր ձեռքերում: Իսկ Կարեն Կարապետյանին այդպես էլ չհաջողովեց դառնալ յուրային Հանրապետականների համար, առավել ևս՝ տապալվեց ՀՀԿ-ն իրենով անելու օպերացիան: Հետևաբար, հարց է առաջանում՝ ո՞րն է կուսակցությունը ձեռքից տված փոխնագահի՝ այդ պաշտոնում մնալու իմաստը: Հանրապետական կուսակցությունը ներկայում հայտնվել է մի վիճակում, երբ Սերժ Սարգսյանի գնալուց հետո ներքին հակասություններն ու շահերի բախումը կարող են դուրս գալ ջրի երես: Այս պահին էլ դրանք զսպողը հենց Սերժ Սարգսյանն է, և եթե անգամ ՀՀԿ ամենավերին էշելոնում տեղի ունենան փոխատեղումներ, և Կարապետյանից բացի այլ կարակառուն գործիչներ ևս հայտնվեն լուսանցքում՝ Սարգսյանը ՀՀԿ-ից չի հրաժարվի, չէ՞ որ դա քաղաքականության մեջ մնալու գլխավոր և միակ երաշխիքն ու գործիքակազմն է: