«Կարմիր գծերը» ներկել եռագույն՝ դարձնելով դրանք հանրային տարածք

«Կարմիր գծերը» ՀՀ քաղաքացու վրա դրված անօրինական հարկատեսակ է։ Այս մասին այսօր՝ հունիսի 25-ին կայացած «Դուրս մեր գրպանից» նախաձեռնության «կարմիր գծերի» վերացման պահանջը մնում է օրակարգային» թեմայով քննարկմանը հայտարարեց «Դուրս մեր գրպանից» նախաձեռնության հիմնադիր Արսեն Պետրոսյանը։

Արսեն Պետրոսյանը շեշտում է՝ երկրում իրավիճակ է փոխվել, ուստի պետք է ՀՀ–ում «կարմիր գծերը» իսպառ վերանան, ՀՀ քաղաքացին չպետք է անօրինական հարկեր ու տուրքեր վճարի։

Նա կոչ է անում բոլորին բոյկոտել եւ այլեւս չվճարել «կարմիր գծերի» համար։

«Դուրս մեր գրպանից» նախաձեռնության անդամ Արմեն Եփրեմյանի փոխանցմամբ՝ նախաձեռնությունը նամակ է պատրաստել ուղղված Նիկոլ Փաշինայնին, որ կառավարությունը ներազդի տեղական ինքնակառավարման մարմինի վրա. «Փաստորեն ականատեսն ենք այնպիսի իրավիճակի, երբ քաղաքապետարանը պետության բացառիկ սեփականություն հանդիսացող երթեւեկելի գոտին որպես սեփականություն տվել է մասնավոր կազմակերպությանը, որից 50 տոկոս դիվիդենտ ունի, որն էլ մսխվում է»։

«Դուրս մեր գրպանից» նախաձեռնությունն առաջարկում է կարմիր գծերը ներկել եռագույն՝ դարձնելով դրանք հանրային տարածք։  «Եթե մարդը վճարում է տեխսպասարկման համար, գույքահարկ է վճարում, նա իրավունք ունի շահագործել մեքենան, եթե շահագործում է մեքենան, ապա իրավունք ունի կայանել նաեւ հանրային վայրում»,–շեշտեց Եփրեմյանը։