Թուրքիայի և Ադրբեջանի արտաքին գործերի նախարարությունների ներկայացուցիչները կժամանեն Երևան

Երևանում կայանալիք Սևծովյան տնտեսական համագործակցության կազմակերպության արտգործանախարարների խորհրդի նիստին կմասնակցեն նաև Ադրբեջանի ու Թուրքիայի ներկայացուցիչները: Տեղեկութոյւնը ԼՈւՐԵՐ.com.ի թղթակցի հետ զրույցում հաստատեց արտաքին գործերի նախարարության մամուլի խոսնակ Տիգրան Բալայանը:

«Երևան կժամանեն Ադրբեջանի փոխարտգործնախարար Մահմուդ Մամեդ-Գուլիևը և Թուրքիայի ԱԳՆ բազմակողմ տնտեսական հարաբերությունների վարչության պետ Օմար Քյուչուքը: Երևանյան հանդիպման շրջանակում տեղի կունենա Կազմակերպությունում ՀՀ նախագահության փոխանցման արարողությունը, որի ժամանակ Ադրբեջանի փոխարտգործնախարար Մահմուդ Մամեդ-Գուլիևը ստանձնելու է կազմակերպության նախագահությունը, մենք իրենց ենք հանձնելու նախագահությունը»,- ընդգծեց Բալայանը:

Նա նշեց, որ Ադրբեջանի և Թուրքիայի արտաքին գործերի նախարարությունների ներկայացուցիչները Երևան կժամանեն վաղը: 

 

«ԱԳ նախախարի տեղակալ Կարեն Նազարյանը և ՍԾՏՀԿ գլխավոր քարտուղար Մայքլ Քրիստիդեսը հանդես կգան մամուլի համար հայտարարություններով»,- ասաց նա:

 

Նշենք՝ այսօր ՀՀ ԱԺ փոխնախագահ Էդուարդ Շարմազանովը ամփոփելով Ալբանիայի մայրաքաղաք Տիրանայում ՍԾՏՀ ԽՎ-ում ՀՀ ԱԺ պատվիրակության այցի արդյունքները նշել էր, որ Սևծովյան տնտեսական համագործակցության (ՍԾՏՀ) խորհրդարանական վեհաժողովի 51-րդ համաժողովում Հայաստանն ստանձնել է Վեհաժողովի նախագահությունն առաջիկա վեց ամիսների համար: 

 

ՍԾՏՀ առաջնայնություններն են՝ առևտուր եւ տնտեսական զարգացում, բանկային գործ և ֆինանսներ, հեռահաղորդակցություն, էներգետիկա, տրանսպորտ, գյուղատնտեսություն և գյուղատնտեսական արդյունաբերություն, առողջապահություն և դեղագործություն, բնապահպանություն, զբոսաշրջություն, գիտություն և տեխնոլոգիաներ, վիճակագրական տվյալների և տնտեսական տեղեկատվության փոխանակում, մաքսային և սահմանային այլ մարմինների միջև համագործակցություն, պայքար կազմակերպված հանցավորության, թմրանյութերի, զենքերի և ռադիոակտիվ նյութերի անօրինական ներկրման, ահաբեկչության և անօրինական արտագաղթի դեմ, արտակարգ իրավիճակների հետեւանքների վերացում, փոքր և միջին ձեռնարկատիրություն, կրթություն, ինստիտուցիոնալ վերազինում և կառավարում: Կազմակերպությունը կոչված է տնտեսական համագործակցության միջոցով ամրապնդելու կայունությունը Սևծովյան տարածաշրջանում և այն վերածելու բարգավաճման գոտու: Կազմակերպության աշխարհագրությունը ծածկում է մոտ 20 միլիոն քառակուսի կիլոմետր տարածք` ընդգրկելով երկու մայրցամաքներում գտնվող Սևծովյան, Բալկանյան և Կովկասյան երկրներ և ներկայացնելով դրանց մոտ 350 միլիոն բնակչությունը: ՍԾՏՀ տարածաշրջանը, որը հարուստ է նավթով և գազով, ինչպես նաև այլ բնական պաշարներով, աստիճանաբար վերածվում է Եվրոպայի ամենակարևոր տրանսպորտային և էներգետիկ փոխադրումների միջանցքներից մեկը: Անդամ երկրների միջև տարեկան առևտրի ծավալը կազմում է ավելի քան 300 միլիարդ ԱՄՆ դոլար:

Սոնա Հարությունյան