«Սովորական վանդալիզմ» Երևանի կենտրոնում

Երևանի կենտրոնում՝ Արամի և Նալբանդյան փողոցների հատվող մասում,  կատարվում են Առաջին Հանրապետության հիմնադիր Արամ Մանուկյանի հուշարձան-կոթողի տեղադրման շինարարական աշխատանքները։ Բայց այս իրողության մեջ մի «բայց» կա։ Բանն այն է, որ այն նախատեսվում է տեղադրել  ճարտարապետ Ջիմ Թորոսյանի նախագծով ստեղծված շատրվանային համալիրով  կառույցի տարածքում, ինչը խաթարում է տարածքի գեղագիտական տեսքը։ 

Ստեղծված իրավիճակի մասին նախկինում էլ է խոսվել, հարց բարձրացվել, բայց լուծում չի եղել։ Այսօր իր ֆեյսբուքյան էջում «ՀԱՅԵՐ» մեդիահարթակի գլխավոր խմագիր Արայիկ Մանուկյանը գրել է խնդրի մասին՝ այն անվանելով «Սովորական վանդալիզմ»։ 

ԼՈՒՐԵՐ․com-ի թղթակցի հետ զրույցում Արայիկ Մանուկյանը պատմեց, որ ժամանակին ԵԼՔ խմբակցության անդամներն էլ են այս հարցը բարձրացրել, իսկ որոշումը կայացրել են նախկին իշխանությունները, որը պետք է վերանայվի։

«Արամ Մանուկյանի հուշարձանն, իր պատվանդանով, կառուցվում է համալիրի աստիճաների վրա, որոնք քանդված են։ Ժամանակին Արամ Մանուկյանի հուշարձանի  մասին խոսել է ԱԺ ներկայիս պատգամավոր Ալեն Սիմոնյանը, կրթության և գիտության ներկայիս նախարար Արայիկ Հարությունյանը։ Մի հուշարձան քանդում ենք, մյուսը ստեղծում․ սա հակաճարտարապետական քայլ է։ Հույսեր ենք կապում Քաղաքաշինության կոմիտեի նորանշանակ նախագահ Ավետիք էլոյանի հետ, թեպետ չգիտենք՝ որքանով նա լծակներ ունի այս հարցի լուծման համար»,-պատմեց խնդրով հետաքրքրված Արայիկ Մանուկյանը։

Հիշեցնենք, որ Ավետիք Էլոյանը մի քանի օր առաջ է ստանձնել ՀՀ քաղաքաշինության պետական կոմիտեի նախագահի պարտականությունները։ Մեր թղթակիցը կապ հասատեց նաեւ Կոմիտեի հետ, որտեղից խոստացան պատասխանել մեզ հուզող հարցերին։

Թեմային կանդրադառնանք նաև առաջիկայում:

Մասնավորապես, սպասում ենք ստանալ հետևյալ հարցերի պատասխանները՝ արդյո՞ք հնարավոր չէ Արամ Մանուկյանի արձանն այլ վայրում տեղադրել և արդյո՞ք այս հարցը, առհասարակ,  Կոմիտեի ուշադրության կենտրոնում է։

Լիլիթ Հակոբյան