ՌԴ Ազգային Տրաստ բանկի Նովոռոսիյսկի կառավարիչ Գեորգի Պողոսովին շնորհվեց Գավառի պատվավոր քաղաքացու կոչում

 Գավառ քաղաքի Կոլոտ Հայրապետի անվան արվեստի դպրոցի շենքում հանդիսավոր պայմաններում քաղաքապետ Գուրգեն Մարտիրոսյանը ՌԴ Ազգային Տրաստ բանկի Նովոռոսիյսկի կառավարիչ Գեորգի Պողոսովին հանձնեց Գավառի պատվավոր քաղաքացու կոչման հավաստագիրը, որը շնորհվել էր համայնքի ավագանու որոշմամբ:  Հանդիսությանը մասնակցում էին ՀՀ կառավարության, Գեղարքունիքի մարզպետարանի, ՌԴ Նովոռոսիյսկ քաղաքի ներկայացուցիչներ, Գավառի կրթամշակութային հաստատությունների, քաղաքապետարանի եւ ենթակա հիմնարկների աշխատակիցներ:

Գավառի քաղաքապետարանի աշխատակազմի ներկայացուցչի տեղեկացմամբ՝ Գերոգի Պողոսովը նման շնորհի է արժանացել հայ-ռուսական հարաբերությունների խորացման, Գավառ-Նովոռոսիյսկ քաղաքների միջեւ հաստատված բարեկամության ու համագործակցության գործում ունեցած դերի համար: Շնորհակալական խոսքով հանդես գալով՝ Գերոգի Պողոսովը միաժամանակ պարտավորվեց՝ արդարացնել իրեն շնորհված կոչումը տեսանելի ու հայրենանվեր գործերով:«Իմ ծնողները ծնվել են Գավառ քաղաքում: Ես մեծացել եմ Նովոռոսիյսկում, սակայն նրանք ինձ հետ խոսել են հայրենի քյավառի բարբառով, որը ես լավ եմ յուրացրել: Մայրս միշտ ինձ ստիպում էր, որ Քյավառի բարբառը լավ իմանամ: Ես նրանց սիրել եմ անսահման, նրանց չափ էլ՝ իմ հայրենի Հայաստանը: Ես երեկ գլխավորել եմ ՌԴ-ից ժամանած հայազգի այն գործարարների պատվիրակությանը, որոնց ընդունեց ՀՀ Վարչապետ Նիկոլ Փաշինյանը:Հանդիպումն անցավ կառուցողական մթնոլորտում, որը խոստանում է Հայաստան բերել լուրջ ներդրումներ, հայրենաշինության ծավալում: Հույսով եմ, որ այդ ներդրումները կհասնեն նաեւ ծնողներիս ծննդավայր Գավառ, ես էլ մասնակիցը կլինեմ հայրենքի քաղաքիս ծաղմանն ու բարգավաճմանը: Կփորձեմ արդարացնել բոլորիդ սպասելիքները մեր բարեկամության խորացման ուղղությամբ: Գավառի պատվավոր քաղաքացու կոչումն այլեւս ինձ համար ավելի շատ պարտականություն է, քան պատիվ»,-ներկաներին դիմեց Գերոգի Պողոսովը:
Ռուսաստանի Դաշնությունում հայկական մշակույթը պահպանելու եւ զարգացնելու գործում ներդրած ավանդի համար Գավառի քաղաքապետ Գուրգեն Մարտիրոսյանը քաղաքապետարանի շնորհակալագրով պարգեւատրեց ՌԴ քաղաքացի, Նոբոռոսիյսկում բնակվող Վլադիմիր Հմայակի Մխիթարյանին: Ներկաներին գեղագիտական հաճույք պատճառեցին Գավառի արվեստի եւ երաժշտական դպրոցների սաները:

Խոսրով Խլղաթյան