«Սա մարդու իրավունքների զանգվածային, երկարատև և համատարած ոտնահարման արգասիք է». «Փաստ»
Հայկական Մամուլ
«Փաստ» օրաթերթը գրում է.
«Ընդդեմ իրավական կամայականությունների» հ/կ նախագահ, Հայաստանի առաջին ՄԻՊ Լարիսա Ալավերդյանի դիտարկմամբ, մենք ազգովի հայտնվել ենք ոչ թե ամերիկյան թրիլերում, այլ ռեալ իրականությունում, երբ բացահայտվող դեպքերի մասին երկար ժամանակ խոսում էր հասարակությունը: Բայց այն, ինչին ազգովի ականատես եղանք, բոլորի սպասածից և երևակայությունից բավականին հեռու էր:
Նրա կարծիքով, պետք չէ կառչել մանրամասներից, քանի որ դրանք գործի քննությանն են առնչվում: Ուստի հարկավոր է զինվել համբերությամբ և սպասել իրավաբանների գնահատականներին: Իսկ նախաքննական մարմնին էլ ժամանակ է հարկավոր բոլոր մանրամասներն ուսումնասիրելու և այն կրկին հանրությանը ներկայացնելու համար:
«Որոշ առումով ստացվում է, որ արդեն կա կանխավարկած: Եվ դրանից հետո, զուտ դասական առումով, պետք է օրենքի տառին և ոգուն համապատասխան գործողություններ իրականացվեն: Խոսքը Մանվել Գրիգորյանի գործին է վերաբերում: Ինչ վերաբերում է ՀՀ երկրորդ նախագահի եղբորը բերման ենթարկելուն և ազատ արձակելուն, ապա նման արագ փոփոխվող իրականության պայմաններում հասարակության մեջ կարող է ավելի շուտ լարվածություն առաջացնել, քան օգուտ տալ գործին: Իրականում շատ բաներ անսպասելի չեն: Ընդհակառակը՝ սպասելի են, դրա համար էլ հարկավոր է, որ ամեն գործողություն ընթանա դասական եղանակով՝ օրենքի տառին և ոգուն համապատասխան, իսկ հասարակությանը ներկայացվեն հնարավորինս հակիրճ և ճշմարիտ տեղեկություններ»,– ասաց Լ. Ալավերդյանը:
Աղքատության նման բարձր ցուցանիշ ունեցող երկրում ապրող մարդկանց մի քանիսի նկուղներում, աշխատասենյակներում, տներում միլիոնավոր դոլարներ պահելու երևույթի մասին նախկին պատգամավորն ավելի վաղ թեև չգիտեր, սակայն հասարակության նման բևեռացվածության պատճառներին դեռևս 2000–ականներին է գնահատական տվել:
«Ես այս երևույթը երկու եզրույթով եմ սահմանել: Առաջինը՝ մեր երկրում ոչ թե աղքատություն կա, այլ աղքատացման պրոցես, որի ընթացքում հիմնավորված ձևով աղքատացնում են ժողովրդին: Եվ երկրորդ՝ եթե երկրաշարժ տեսած, պատերազմի միջով անցած և շրջապատման մեջ գտնվող մի երկրում հայտնվում են տասնյակ հարստացած անձինք, ապա դա նշանակում է, որ աղքատացումը արմատներ ունի, և հարկավոր է այդ երևույթն արմատախիլ անել: Այս ամենի արդյունքում, սակայն, որևէ բացահայտում այդպես էլ տեղի չունեցավ: Եվ, կարծեք թե, որոշ գործերով կասկածներ արտահայտվում էին, ձևակերպումներ արվում էին, սակայն երևույթները գնալով ավելի ու ավելի սարսափելի էին դառնում: Բայց պետք է փաստենք, որ այսքան տարիների ընթացքում այդպես էլ որևէ բացահայտում տեղի չունեցավ»,– ասաց Լ. Ալավերդյանը:
«Այստեղ երկու կարծիք լինել չի կարող: Եվ այն, ինչ այս օրերին բացահայտվում է, կարելի է բնութագրել այսպես. սա մարդու իրավունքների զանգվածային, երկարատև և համատարած ոտնահարման արգասիք է: Երբ նախկինում բացահայտում էինք որևէ երևույթ, մեզ ասում էին՝ գիտեք, գրեթե պատերազմի մեջ գտնվող երկիր ենք: Ես այն ժամանակ ասել եմ, որ եթե պատերազմական վիճակ է, նշանակում է՝ բանակում կոռուպցիան պետք է դիտարկվի որպես դավաճանություն: Բացի այդ, եթե երկիրը պատերազմական վիճակի մեջ է գտնվում, ապա պատասխանատվություն կրողը առաջինը պետք է իշխանությունը լինի, ոչ թե լռեցնի ձայն բարձրացնողներին միայն այն պատճառով, որ երկիրը գտնվում է պատերազմական վիճակի մեջ»,– ասաց Լ. Ալավերդյանը:
Այդ ո՞ր ամենատարբեր՝ քաղաքական, հասարակական կազմակերպությունների, լրատվական ծառայությունների կողմից թերության ու թերացման մասին չի բարձրաձայնվել, նշում է, կազմակերպության ղեկավարը: Բայց, փաստորեն, այդ ամենը որևէ ազդեցություն էլ չի ունեցել նախկին իշխանությունների գործունեության վրա: Ուստի, պետք էր նման իրավիճակ ստեղծվեր, որպեսզի բոլոր անօրինականությունները բացահայտվեին:
«Եվ եթե մենք հիմա այս պահը չօգտագործենք և այս արատավոր երևույթներն արմատախիլ չանենք, կարող ենք կրկին ժամանակի կորուստ ունենալ, որը գնալով ավելի ու ավելի թանկ կնստի ժողովրդի վրա»,– ասաց Լ. Ալավերդյանը:
Շարունակությունը՝ «Փաստ» օրաթերթի այսօրվա համարում
ՈՒՂԻՂ ԵԹԵՐ
Ամենադիտված 
Խստորեն դատապարտում եմ Ռուբեն Ռուբինյանի կողմից Ստամբուլում թուրք տեսած լինելը. Դանիել Իոաննիսյան
