Ո՞վ ուտի, ո՞վ գնա «սանատորիա»

Տարօրինակ մի բան կա, որ շատերն են նկատում, բայց համատարած էյֆորիայի միջավայրում վախենում են բարձրաձայնել: Արդեն այս ամեն ինչից 37 թվի հոտ է գալիս: Հարևանը բողոքում է հարևանի դեմ, վերադասը՝ ենթակայի, աշխատողը՝ գործատուի, մուկը կատվի ու այդպես շարունակ: Քանի գնում կենացները քաղցրանում են, ամեն օր ձերբակալություններ, կոռուպցիոն սխեմաների նոր բացահայտումներ:

Այո, տասնամյակներ շարունակ երկիրը թալանվել, մարդկանց իրավունքները ոտնահարվել են, դրա համար շատերը պետք է պատասխան տան, բայց հատուցումը պետք է լինի համարժեք ու համաչափ, այլապես թացն ու չորը կխառվեն իրար, եթե արդեն այդպես չէ:

Իրավապահներն էլ են հետաքրքիր, բոլորին դրել ու մի սանրով սանրում են: Վերջերս մի գործի մասին իմացա: Արտակարգ իրավիճակների նախարարությունում բարձրաստիճան մի քանի պաշտոնյայի են ձերբակալել, իբր պետական փողերը յուրացնելու կամ նման մի բանի համար: Իրականում գործը վերաբերում է պետական փողերին, բայց յուրացում չկա: Ո՞նց կարող է պատահել, կհարցնեք: Բացատրեմ: Տարիներ շարունակ, ԱԻ նախարարների կարգադրությամբ պետբյուջեից հատկացված ու խնայված միջոցները նախարարության աշխատակիցները ստացել են որպես պարգևավճարներ կամ էլի չգիտեմ որպես ինչ ու, ոչ ավել, ոչ պակաս, վերադարձրել են նույն նախարարությանը, բյուջեով չնախատեսված, բայց խիստ անհրաժեշտ այլ միջոցառումներ իրականացնելու նպատակով: Պետության փողերը նույն գերատեսչության շրջանակներում ծախսվել են նույն գերատեսչության այլ գործառույթների իրականացման համար և դրա համար պատասխանատվության են ենթարկվում ոչ թե նախարարը, ոչ թե բյուջեն կազմողն ու դա խորհրդարանում ընդունողները, այլ «եզրայինները»՝ նախարարության աշխատակիցները:

Շուտով պարզ կլինեն գործի հանգամանքները և վստահ եմ, որ արդար նախաքննություն կընթանա, բայց նույնքան էլ վստահ եմ, որ նստվածքը մնալու է: Վստահ եմ, որովհետև նույն պետությունից միլիարդներ գողացած չինովնիկին կամ նրա հետ բացահայտ փոխկապակցված անձին տեսախցիկների առջև ձերբակալում ու մի քանի ժամ անց բաց են թողնում, իսկ նույն պետության փողը նույն պետության նույն գերատեսչության մեկ այլ գործառույթի համար օգտագործողներին կալանքի տակ են պահում:

Մյուս կողմից էլ անհասկանալի է, եթե ԱԻՆ իր գործառույթների համար պետբյուջեից գումար է ստանում, ի՞նչն է խանգարում, որ բյուջեի նախագծում գումարները ճիշտ ու անհրաժեշտ հոդվածներով բաշխվեն: Թե պարտադիր պետք է շիլաշփոթ սարքվեր, որ մարդիկ ակամա ինչ-որ կոռուպցիոն սխեմաներում հայտնվեին: Գուցե հենց դա էր պետք նախկին համակարգին, որ «կաբալի» ենթարկեր պետական կառավարման ապարատը՝ նախարարից մինչև դռնապան, դարձնելով իր մեքենայությունների հլու կամակատարը:

Ավելացնեմ միայն, որ այդ նախարարների թվում են ինչպես երջանկահիշատակ Արմեն Երիցյանը, այնպես էլ ներկայիս Պաշտպանության նախարար, նախկինում ԱԻ նախարար Դավիթ Տոնոյանը:

Գործի հանգամանքները պարզելու նպատակով կապվեցինք մեղադրվողներից մեկի փաստաբան Գեորգի Մելիքյանի հետ:

«Առայժմ զերծ կմնամ մեկնաբանություններից, գործը գտնվում է նախաքննության փուլում: Միայն կարող եմ ասել, որ արդարությունը հաղթելու է, իմ պաշտպանյալի անմեղությունը կապացուցվի: Ես վստահ եմ»,- ասաց փաստաբանը:

Էդուարդ Սարիբեկյան

Vesti.am