2-3 տարի իր ընտանիքի անդամին չտեսնելն անթույլատրելի է․ ՄԻՊ-ը ներկայացրեց տարեկան զեկույցը

Մարդու իրավունքների պաշտպան Արման Թաթոյանն այսօր ներկայացրեց 2017-ի տարեկան զեկույցը: Օմբուդսմանն, անդրադառնալով լրագրողների գործունեությանը, նշեց, որ լիարժեք չի գործում լրագրողների գործունեության խոչընդոտման համար պատասխանատվության ինստիտուտը.

«Լրագրողները լիարժեք պաշտպանված չեն: Ես կարևորում եմ լրագրողի ազատ և անկաշկանդ աշխատանքը և մենք աշխատանքներ ենք տանում՝ պաշտպանելու լրագրողի ազատ աշխատանքը, և մշակել ենք մի քանի իրավական չափանիշներ: Մենք ունենք գաղափար, որ պետք է գործի լրագրողի աշխատանքի նկատմամբ բարեխղճության, ազնվության կանխավարկածը: Ի վերջո, պետք է նկատի ունենալ, որ լրագրողի աշխատանքը ինքնանպատակ չէ և քաղաքացին նրա աշխատանքի շնորհիվ է տեղեկություններ ստանում, թե պետական այս կամ այն մարմինն ինչպես է աշխատում»,- ասաց Թաթոյանը:

Նա նշեց` Սահմանադրական դատարան է դիմել Հարկային օրենսգրքի հետ կապված, ըստ նրա, քողարկված տեսքով, բացի օրենքով նախատեսված դեպքերը, այլ հարկատեսակներ են կիրառվում: 

Օմբուդսմանը նկատեց, որ մեզ մոտ 37,4 տոկոսով գերազանցված է կալանավորների ու դատապարտյալների ցուցանիշը. «Մարդը, երբ կալանավորվում է, հնարավորություն չունի քննիչի արգելքից հետո տեսակցել իր մերձավոր հարազատներին, ավելին՝ անգամ ընտանիքի անդամին: Մարդը կարող է 2-3 տարի իր ընտանիքի անդամին չտեսնել, սա, կարծում եմ՝ անթույլատրելի է, և այստեղ գործ ունենք զրկանքի հետ, որոնք պատճառ են դառնում ինքնավնասումների, ինքնասպանությունների: Մենք նույնիսկ դեպք ունենք, փաստաբանը պատմում է, որ դատապարտյալը խնդրել էր, որ իր փաստաբանը գա և պատմի իրեն իր ընտանիքի անդամների մասին: Այս ակտը պետք է կիրառվի դատարանի կողմից, և առնվազն դատախազի միջնորդությամբ, քննիչը չպետք է կապվի այս որոշման հետ: Եթե նախաքննություն է գնում դա չի նշանակում, որ մարդը ավտոմատ պետք է զրկվի ընտանիքի անդամին տեսակցելուց»,- նկատեց Թաթոյանը: