Այգեկցիները նորմալ տրանսպորտ են ուզում, «գծատերն էլ ինչ-որ գողական մարդ է...»

Արմավիրի մարզի Այգեկ գյուղի բնակիչները բողոքում են հասարակական տրանսպորտի վիճակից: Բնակիչները պնդում են՝ ոտնահարվում են թե՛ ուղևորների, թե՛ վարորդների իրավունքները։ Բանն այն է, որ այս և հարակից գյուղերի բնակիչները Երևան հասնելու համար օգտվում են միակ՝ 205 համարի երթուղուց: Նրանց խոսքով՝ տրանսպորտով երթևեկելը պատուհաս է դարձել իրենց գլխին. կա՛մ լավ չի աշխատում, կա՛մ քանակն է քիչ: 

Բնակիչների խոսքով՝ այս պահին գծի մեջ մնացել է 10 մեքենա, որոնց անսարքության պատճառով տեղափոխվելու համար երթուղային չի լինում։ Բնակիչների պահանջն է երթուղու աշխատանքն այնպես կազմակերպել, որ մարդիկ կարողանան նորմալ հասնել Երևան և հետ գնալ:

ԼՈւՐԵՐ.com-ի թղթակցի հետ զրույցում բնակիչները փոխանցեցին, որ այս ուրբաթ պատրաստվում են հանդիպել Տրանսպորտի, կապի և տեղեկատվկան տեխնոլոգիանաերի նախարարի հետ և բարձրացնել իրենց բողոքը:

«Մենք մշտապես բարձրացրել ենք տրանսպորտի խնդիրը: Մեզ վստահեցնում են, թե տրանսպորտի նոր խմբաքանակ է գալիս և որ դրանից մեզ էլ է բաժին հասնելու: Բայց մինչև բոլոր գծերին տրանսպորտ չհասնի, չեն տրամադրելու տրանսպորտային միջոցները: Մեզ ոչ մի տեղից հստակ պատասխան չեն տալիս:

Գծատերն էլ ինչ-որ գողական մարդ է, պահանջներ է ներկայացնում վարորդներին։ Երթուղայինը վերանորոգելու հարցերը, գազը վարորդների վրա է ու օրվա վերջում էլ 8000 դրամ գծի փող են տալիս։ Եթե մեքենան վնասվի՝ վարորդն իր գրպանից պետք է ծախս անի դրա համար, բայց չէ՞ որ էդ մարդիկ էլ գրեթե գումար չեն աշխատում»,- մեզ հետ զրույցում իր դժգոհությունը հայտնեց Այգեկ գյուղի բնակիչներից մեկը։

Այգեկի բնակչուհիներից Շուշան Գրիգորյանն էլ պատմեց, որ խնդիրը տարիների պատմություն ունի: Դեռևս 2017թ.-ին, իր՝ արժանապատիվ տրանսպորտի պահանջին միացել են 1500-ից ավելի համագյուղացիներ, ինչպես նաև հարակից գյուղի բնակիչներ: Սրան հետևել է Տրանսպորտի վարչության նախկին պետի հետ հանդիպելու հրավերը, որի ժամանակ, ըստ Շուշանի, տրվել են խոստումներ, որոնցից ոչ մեկը չի իրականացել: Բայց ըստ նրա՝ խնդիրը մեկ այլ տեղ է:

«205 երթուղին սպասարկող «Շանթ Գյուրջոյան» ՍՊԸ-ն, մեկ տարուց ավելի է՝ ապօրինի է գործում, իսկ դրանից առաջ խախտել է իր պայմանագրային գրեթե բոլոր պարտավորությունները, ահաբեկել վարորդներին, պարբերաբար դիմել բռնության ու ծեծի (մանրամասները երևի բարձրաձայնողներ կգտնվեն վարորդների միջից, կամ կշարունակեն ահաբեկված մնալ): Մյուս փաստն այն է, որ ես Ա. Ասծատրյանին ներկայացրել եմ «Շանթ Գյուրջոյան» ՍՊԸ-ի ակնհայտ խախտումները՝ կապված երթուղու ապօրինի վերջնակետի, ուղղության և ժամանակացույցի հետ, ի պատասխան իմ մատնանշումների՝ այն ժամանակվա նախարար Վահան Մարտիրոսյանը հաջորդ օրը ստորագրում է փաստաթուղթ, որով օրինականացնում է այդ բոլոր խախտումները՝  մի ընկերության շահը գերակա համարելով 10.000 բնակչի շահերից, ինչը վառ ապացույցն է այն բանի, որ «Շանթ Գյուրջոյան» ՍՊԸ-ն ունեցել է պետական հովանավորչություն, և նրանք գտնվել են հանցավոր համագործակցության մեջ։ «Շանթ Գյուրջոյան» ՍՊԸ-ն պայմանագրով սահմանված ժամկետները լրանալուց հետո շարունակում է ծառայություն մատուցել՝ առանց նախարարության կողմից մրցույթ հայտարարվելու և առանց անհրաժեշտ գործընթացն անցնելու»,- մանրամասնեց այգեկցին:

Նա ընդգծեց՝ իրենք շատ լավ հասկանում են, որ խնդիրները համակարգային են ու միայն իրենց գյուղում չեն։ Բայց դա չի նշանակում, որ պետք է աչք փակել օրենքի խախտումների առաջ։ Կան ակնհայտ ժամանակավոր լուծումներ մինչև համակարգային փոփոխության ավարտը, բայց ոչ մի քայլ չի արվում։

Փաստենք, որ նախորդ կառավարությունը տրանսպորտային ոլորտի խնդիրներին լուծում այդպես էլ չտվեց: Նկատենք՝ թեև նոր կառավարության գործելաոճը խոտումնալից է, ու թվում էր, թե հեղափոխական լուծումներ պետք է տրվեին տրանսպորտային խնդիրներին, այն է՝ լավ որակի մեքենաներ և սպասարկման որակի բարձրացում, բայց փաստն այն է, որ որևէ տեղաշարժ այս ոլորտում դեռևս չկա:

Սոնա Հարությունյան