Մնացական Բիչախչյանը՝ Արտյոմ Կանևսկոյին կեղծ անձնագիր տալու լուրերի մասին

Քրեական հեղինակություն Արտյոմ Կանեւսկոյին կեղծ անձնագիր չի տրամադրվել: Այս մասին Facebook-ի իր էջում գրել է Ոստիկանության անձնագրային եւ վիզաների վարչության պետ Մնացական Բիչախչյանը՝ անդրադառնալով մամուլի տեղեկություններին, ըստ որի՝ հայտնաբերվել է կեղծ անձնագիր՝ տրամադրված Էջմիածնի անձնագրային բաժնի կողմից, քրեական հեղինակություն համարվող Արտյոմ Կանեւսկոյի համար։

«ՀԵՐՔՈՒՄ
ԻՄ ԿՈՂՄԻՑ ՈՐԵՎԷ ԱՆՁԻ ԿԵՂԾ ԱՆՁՆԱԳԻՐ ԵՐԲԵՎԷ ՉԻ ՏՐԱՄԱԴՐՎԵԼ ԵՎ ՏՐԱՄԱԴՐԵԼՈՒՆ ՉԵՄ ՕԺԱՆԴԱԿԵԼ

Զանգվածային մի շարք լրատվության միջոցներով տարածվել է տեղեկատվություն, համաձայն որի հայտնաբերվել է կեղծ անձնագիր՝ տրամադրված Էջմիածնի անձնագրային բաժնի կողմից, Արտյոմ Կանևսկոյի համար։ 

Ըստ շրջանառվող լուրերի քննության արդյունքում պարզվել է, որ մեծ թվով անձինք են մասնակցել այս կեղծիքին՝ կեղծ տեղեկանք տրամադրած գյուղապետը, կեղծ տվյալներ լրացրած բաժինը, անձնագրային ծառայության պետ Մնացական Բիչախչյանը։

Կոչ եմ անում լրատվամիջոցներին չճշգրտված տեղեկատվություն չտարածել։
Իմ ծառայողական գործունեության ընթացքում որևէ անձի կեղծ անձնագիր չեմ տրամադրել և կեղծ անձնագրի տրամադրմանը չեմ օժանդակել։

Հավելեմ, որ երբևէ անձնագրային ծառայության պետի պաշտոն չեմ զբաղեցրել, 2015թ. հոկտեմբերի 20-ի հրամանով նշանակվել եմ Անձնագրային և վիզաների վարչության պետի պաշտոնին»,- գրել է Մնացական Բիչախչյանը: 

։