Ով ում է վարկաբեկում

Վերջին շրջանում լուրեր են շրջանառվում, որ Արտաքին գործերի նախարարության մամուլի խոսնակ Տիգրան Բալայանն առաջիկայում դեսպան է նշանակվելու: Թե ո՞ր երկրում՝ հայտնի չէ: Սակայն նկատենք՝ այս հանգամանքը տարակարծության տեղիք է տվել. ոմանք ողջունում են, ոմանք էլ՝ քննադատում:

ԼՈւՐԵՐ.com դիմած քաղաքացին ուշագրավ փաստաթղթեր է ներկայացրել` փորձելով վստահեցնել, թե Տիգրան Բալայանը դեռևս հեղափոխության օրերին վարկաբեկել է ներկայիս վարչապետ Նիկոլ Փաշինյանին ու համաժողովրդական շարժումը. «Հեղափոխության օրերին ՀՀ նախկին ԱԳ նախարար Է. Նալբանդյանն իր մերձավոր ՀՀ ԱԳՆ մամլո խոսնակ Տիգրան Բալայանի հետ պատրաստել և ՀՀ դեսպանություններ են ուղարկել հետևյալ բովանդակությամբ հանձնարարական (լուսանկարները՝ տես ստորև), որպեսզի ՀՀ դեսպանները հանդիպեն տեղի բարձրագույն իշխանությունների հետ և վարկաբեկեն Նիկոլ Փաշինյանին և համաժողովրդական շարժումը: Այս ամենից հետո Տ. Բալայանը ոչ միայն շարունակում է մնալ նույն պաշտոնին այլև ներկայացվել է և հավակնում է դառնալ ՀՀ դեսպան: Մինչդեռ նրա և իր նախկին ղեկավարի կատարածը կարելի է որայել որպես ժողովրդի հանդեպ դավաճանություն»,- գրել է մեր աղբյուրը՝ փորձելով ցույց տալ, թե ինչպես է դեսպանությունների հետ աշխատել ԱԳՆ-ն մինչև հեղափոխությունը:

Սակայն Տիգրան Բալայանն այն կարծիքին է, որ բացի այն, որ սա զավեշտալի է, այլ նաև իր անձի դեմ ուղղված վարկաբեկման փորձ է: ԼՈւՐԵՐ.com-ի թղթակցի հետ զրույցում ԱԳՆ խոսնակ Տիգրան Բալայանն անդրադարձավ թե՛ ներկայացված փաստաթղթերին, թե՛ դեսպան նշանակվելու ընթացակարգերին:

«Դեսպան նշանակվել-չնշանակվելու հարցերը չեն մեկնաբանվում մինչև նախագահը հրամանագիր չստորագրի: Ինչ-որ մեկը գուցե հերթական հրապարակումը կարդալով, փորձում է հենց ինձ վարկաբեկել, ինչը չեմ ընդունում, հատկապես, որ այն հիմնված է կեղծ փաստերի վրա: Ծանոթանալով փաստաթղթերին՝ պարզ է դառնում, որ դրանք բաց աղբյուրներով դեսպանություններին ուղարկված հանձնարարականներ են, որոնք բացահայտ հրապարակվել են:

Առաջին՝ սա գնահատում եմ որպես չհաջողված վարկաբեկման փորձ, երկրորդ՝ ծանոթանալով փաստաթղթերին՝ ակնհայտ է դառնում, որ այն, ինչ ուղարկվել է ԱԳՆ-ից դեսպանություններ՝ ընդամենը իրավիճակի ամփոփում է և բաց աղբյուրներին հասանելի տեղեկատվություն, որը դեսպաններին է ուղարկվել հանդիպումների ժամանակ հնարավոր օգտագործման համար: Երրորդ՝ չեմ կարծում, որ սա գործունեության ճիշտ մեթոդ է»,- ընդգծեց Բալայանը: 

Հիշեցնենք՝ Տիգրան Բալայանը ՀՀ ԱԳՆ մամուլի խոսնակի պաշտոնը զբաղեցնում է դեռևս 2010 թ. հունիսից։ Նա ՀՀ Սահմանադրական դատարանի պաշտոնաթող դատավոր, Գերագույն խորհրդի նախագահության անդամ Կիմ Բալայանի որդին է:

Սոնա Հարությունյան