Ո՞ր ոլորտում կլինեն նոր բացահայտումները. Փաշինյանը բացել է փակագծերը
Վերլուծական
Վարչապետ Նիկոլ Փաշինյանը իրավապահներին հանձնարարել է ուշադրության կենտրոնում պահել Հյուսիս-Հարավ մայրուղու կառուցման աշխատանքները՝ պարզելու համար՝ այնտեղ եղե՞լ են չարաշահումներ, թե՞ ոչ: Սա ազդակ է իրավապահ համակարգին և չպետք է զարմանալ, եթե հաջորդ աղմկահարույց բացահայտումները կապված լինեն հենց այս նախագծի հետ, որը, ի դեպ, պետք է դառնար Սերժ Սարգսյանի նախագահության շրջանի զարդը, սակայն փաստը մնում է փաստ՝ ճանապարհի 556 կմ-ից մինչ օրս ավարտին է հասցվել ընդամենը 31 կմ-ը:
Նկատենք, որ Հյուսիս-հարավ մայրուղու շինարարության ոլորտում առկա կոռուպցիան նոր չէ. այստեղ տիրող իրավիճակի մասին ամենաբարձր մակարդակով խոսակցություններ եղել են նաեւ նախկինում։ Դեռ 2013թ. ՀՀ վերահսկիչ պալատն ուսումնասիրություններ էր կատարել Հյուսիս-Հարավ ավտոճանապարհաշինության ծրագրում, եւ պարզվել էր խայտառակ պատկեր՝ իրականացվել էին անորակ աշխատանքներ՝ առանց պահպանելու տեխնիկական չափանիշները։ Այդ ժամանակ ՎՊ բացահայտումներից հետո մեծ աղմուկ բարձրացավ։ Ընդ որում՝ հիմնական դժգոհողն էլ նախկին վարչապետ Տիգրան Սարգսյանն էր. ըստ որոշ տեղեկությունների՝ Հյուսիս-հարավ ճանապարհաշինարարությունն իրականացնող իսպանական կազմակերպությունն առանչություն ուներ անձամբ Տիգրան Սարգսյանի հետ, եւ կատարվածը նրա թողտվությամբ էր եղել։ Սակայն ուշագրավն այստեղ մեկ այլ հանգամանք է. ՀՀ տրանսպորտի ու կապի նախարարությունն էլ ստանձնել էր այդ խնդիրները քողարկողի դերը՝ ի դեմս տարբեր նախարարների, որոնք հաջորդում էին մեկը մյուսին: Սա՝ միանգամայն հասկանալի պատճառներով։ Ընդ որում, պարզ է նաեւ այն, որ նախարարությունն այս խնդիրները փորձում էր քողարկել ոչ թե ինքնակամ, այլ նախկին վարչապետ Սերժ Սարգսյանի գիտությամբ։
Կոռուպցիայի մասին բազմաթիվ ահազանգերից հետո միջազգային դոնոր կազմակերպությունները պարզապես հրաժարվեցին հերթական տրանշը տրամադրել ՀՀ կառավարությանը, և այսօր Հյուսիս-հարավը իսկական տնտեսական չարիքի է վերածվել մեր երկրի համար: Գուցե բացահայտումները և դրանց արդյունքում վեր հանված գումարները հնարավորություն տան ի վերջո ավարտի՞ն հասցնել այս նախագիծը: Սակայն ցանկալի է, որ առնվազն համապետական նշանակության այս նախագծի դեպքում ուսումնասիրությունները լինեն ավելի խորքային: Ունենք արդեն օրինակներ, երբ ողջ պատասխանատվությունը բարդվել է ՊՌԱԿ-ի տնօրենների վրա, իսկ խոշոր ձկները հասցրել են ճողոպրել: Ոչ պակաս կարևոր է, որ այս հետաքննությունը, եթե այն իհարկե լինի, կարող է նախադեպ դառնալ ճանապարհաշինարարութան ոլորտում լայնածավալ ստուգումների և բացահայտումների համար: Իսկ թե ինչպիսի բարձիթողի վիճակ է այստեղ, և ինչ հսկայական գումարներ են պտտվում՝ որևէ մեկի համար գաղտնիք չէ…
Ստելլա Խաչատրյան
ՈՒՂԻՂ ԵԹԵՐ
Ամենադիտված 
«Մարինան նույնպես չկարողացավ հաղթել այդ չարիքին». Իրինա Թովմասյանը ցավալի լուր է հայտնել
