Երևանը պատրաստվում է պատմության մեջ ամենամասշտաբային միջոցառմանը

Հոկտեմբերի 11-12-ին Հայաստանում անցկացվելու է Ֆրանկոֆոնիայի գագաթնա­ժողովը, և մեծ թվով պատվիրակություններ, որոնց թվում նաև պետու­թյունների ղեկավարներ,գալու են Երևան: Միջոցառումն անցկացնելու համար մեծ աշխատանքներ է անհրաժեշտ իրականացնել։

ԼՈւՐԵՐ․com-ի հետ զրույցում ԱԳՆ մամուլի խոսնակ Տիգրան Բալայանն ասաց, որ բավականին արագ են աշխատանքներն առաջ ընթանում և փոխվարչապետի գլխավորությամբ ստեղծվել է միջգերատեսչական հանձնաժողով, որը շաբաթը մեկ անգամ հավաքվում և քննարկում է կազմակերպչական հարցերը, իսկ խնդիրներ լինելու դեպքում դրանք օպերատիվ կարգով լուծում են ստանում։

Մեր դիտարկմանը, որ նախորդ իշխանությունների օրոք է ընտրվել Ֆրանկոֆոնիայի անցկացման վայրը՝ հնարավո՞ր է՝ այն արժանանա Հանրապետության 100-ամյակի բախտին, Բալայանն ասաց, որ ճիշտ է՝ ծրագիրը, կարգախոսը, հիմնական թեմաները, ընդունելի փաստաթղթերի նախագծերը մեկնարկել են անցյալ տարվա նոյեմբերին՝ ֆրանկոֆոնիայի նախարարական համաժողովի հաստատումով, բայց այժմ էլ ամեն ինչ ընթանում է ըստ ժամանակացույցի։

«Ոչ մի հարց չկա, որ կարող ենք ասել՝ աշխատանքներում հետընթաց ունենք, ավելին՝ նախորդ իշխանության օրոք հաստատված չէր, որ այստեղ անցկացվելու է ֆրանկոֆոն լրագրողների միության  կոնգերսը, բայց դա էլ է արդեն հաստատվել։ Այժմ ընթացքի մեջ են պատվիրակությունների և նրանց սպասարկող անձնակազմի՝ հյուրանոցներում տեղակայելու հարցը։ Մենք նպատակադրված ենք անցկացնելու լավագույն գագաթնաժողովը՝ հաշվի առնելով, որ սա Հայաստանի անկախությունից ի վեր և ընդհանրապես Հայաստանի պատմության ընթացքում իր մասշտաբով ամենախոշոր միջոցառումն է լինելու»,-ասաց Բալայանը։

Նշենք, որ Գագաթնաժո­ղովի նախօրյակին Ֆրանսիայի նախա­գահ էմանուել Մակրոնը երկօրյա պետական այցով կժամանի Հայաստան, իսկ Կանադայի վարչապետ Ջասթին Թրյուդոն գագաթնաժողովից հետո երկօրյա պետական այցով կմնա Հայա­ստանում: