Ո՞վ է Ռոբերտ Քոչարյանին կալանավորելու որոշում կայացրած դատավորը

Ինչպես արդեն տեղեկացրել ենք՝ Մարտի 1-ի գործով երեկ Ռոբերտ Քոչարյանին մեղադրանք է առաջադրվել ՀՀ Քրեական օրենսգրքի 301.1 հոդվածի 1-ին մասով՝ այն բանի համար, որ նա այլ անձանց հետ նախնական համաձայնությամբ 2008 թվականի Մարտի 1-ին տապալել է Հայաստանի Հանրապետության սահմանադրական կարգը: 

Բոլորին հետաքրքրում է՝ ո՞վ է այն դատավորը, ով «համարաձակվել է» նման որոշում կայացնել: Նա դատավոր Վաչե Մարգարյանն է:

1999 թվականին ավարտել է ԵՊՀ իրավաբանական ֆակուլտետը, իսկ 2012 թվականին՝ ՀՀ պետական կառավարման ակադեմիայի մագիստրատուրան:

2002 թվականից մինչև 2007 թվականն աշխատել է ՀՀ Կոտայքի մարզի ընդհանուր իրավասության առաջին ատյանի դատարանում` որպես դատավորի օգնական:

2007 թվականից մինչև 2008 թվականն աշխատել է ՀՀ դատական դեպարտամենտի պրակտիկայի ամփոփման վարչությունում` որպես ավագ մասնագետ:

2008 թվականից մինչև 2015 թվականն աշխատել է Երևանի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի աշխատակազմի ղեկավար:

2015 թվականի փետրվար ամսից մինչև դեկտեմբեր ամիսը հանդիսացել է ՀՀ արդարադատության ակադեմիայի ունկնդիր:

2016 թվականից մինչև 2017 թվականն աշխատել է ՀՀ դատական դեպարտամենտի ղեկավարի խորհրդական:

ՀՀ Նախագահի 2017 թվականի մարտի 10-ի հրամանագրով նշանակվել է Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի դատավոր:

ՀՀ ԱԺ կողմից 2017 թվականի դեկտեմբերի 21-ի թիվ ՀՕ-34-Ն օրենքի համաձայն շարունակում է պաշտոնավարել Երևան քաղաքի ընդհանուր իրավասության դատարանի դատավորի պաշտոնում: