«Մենք չմո չենք ինչպես նախարարն է մեր երկիրն ու հայերին անվանել». «Գրիգոր Լուսավորիչ» ԲԿ-ի մասնագետ

Ինչպես արդեն տեղեկացրել ենք՝ «Գրիգոր Լուսավորիչ» ԲԿ-ի բակում են հավաքվել հիվանդանոցի մի խումբ աշխատակիցներ: Նրանք իրականացնում են բողոքի ակցիա ի պաշտպանություն նախկին տնօրեն, երեկ աշխատանքից ազատված Արա Մինասյանի։

ԼՈւՐԵՐ.com-ի հետ զրույցում ակցիայի մասնակից Լառա Մուրադյանը նշեց, որ պայքարելու են մինչև վերջ և գործադուլ են անելու մինչև կհանդիպեն Առողջապահության նախարար Արսեն Թորոսյանին։

«Մեր տնօրենի նման ազնիվ, մաքուր մարդ մենք դեռ չենք տեսել։ Նա բազմաթիվ մարդկանց կողքին է եղել, ովքեր այսօր այստեղ ակցիա են իրականացնում։ Պարոն Մինասյանը 90-ականներից ղեկավարում է այս հիմնարկը, բայց չգիտես ինչու պարոն Թորոսյանը անընդհատ շեշտում է նրա խնամիական հարաբերությունները նախկին նախագահ Սերժ Սարգսյանի հետ։ Որտե՞ղ էր Սերժ Սարգսյանը, երբ պարոն Մինասյանը տնօրեն էր»,- ասաց Մուրադյանը։

Անդրադառնալով նախարար Թորոսյանի՝ երեկ ուղիղ եթերում հնչեցրած մտքերին, չարաշահումների մեղադրանքին, ակցիայի մասնակիցը ընդգծեց՝ եղել է նույն հիվանդին մի քանի անգամ են սպասարկել, քանի որ վերջինս եղել է անօթևան և կրկնակի բուժման կարիք է ունեցել։

«Նա, ի տարբերություն այլ հիվանդանոցների, աղքատների գումար չունենալու դեպքում էլ վիրահատել է նրանց։ Դրանք կեղծ խոսակցություններ են։ Թող նախարարը էնքան տղամարդկություն ունենար գար կանգներ մեր դիմաց և մեզ ասեր, ոչ թե թաքուն «լայվ» մտներ։ Մենք չմո չենք ինչպես նախարարն է մեր երկիրն ու հայերին անվանել։ Մենք պայքարելու ենք։ 1700 մարդու ձայն հնարավոր չէ՝ չլսվի»,-հավելեց Մուրադյանը։