Հայկ Մարությանը երկքաղաքացիություն ունի. նա չի՞ կարող քաղաքապետ դառնալ

«Քաղաքացիական պայմանագիր» կուսակցության Երևանի քաղաքապետի թեկնածու Հայկ Մարությանը, ով վերջերս էր անդամագրվել կուսակցությանը, որոշ տեղեկությունների համաձայն, ոչ միայն Հայաստանի, այլ նաև Չեխիայի Հանրապետության քաղաքացի է։ Ի դեպ, Հայկ Մարությանը տարածված ինֆորմացիայի վերաբերյալ պարզաբանում չի տվել, ինչը, բնականաբար, նրա օգտին չի խոսում:

Ըստ «Երևան քաղաքում տեղական ինքնակառավարման մասին» ՀՀ օրենքի 42-րդ հոդվածի՝ քաղաքապետ կարող է դառնալ 30 տարին լրացած, Հայաստանի Հանրապետության քաղաքացիություն ունեցող և ավագանու անդամ համարվող այն անձը, որը չունի այլ պետության քաղաքացիություն:

2. Քաղաքապետը չի կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առևտրային կազմակերպություններում, կատարել վճարովի այլ աշխատանք, բացի գիտական, մանկավարժական և ստեղծագործական աշխատանքից:

Հետևաբար, ՔՊ-ն կամ Հայկ Մարությանը պետք է պարզաբանումներով հանդես գան, քանի որ պետական խողովակներով անձի երկքաղաքացիություն ունենալու մասին տեղեկությունը ժամանակատար է և, որպես կանոն, այն չի ստուգվում:

Ստացվում է՝ օրենքի պահանջը կա, բայց չկա կիրառելու հնարավոր արդյունավետ մեթոդներ, ինչը կարող է հանգեցնել անձի կողմից օրենքի շրջանցմանը:

Հեղափոխության միջոցով իշխանության եկած քաղաքական ուժի համար, այն էլ սկզբնական շրջանում, սա լրջագույն բացթողում կարող է լինել: