Հույս կա, որ Հայաստանն էլ նկարներիս նման պայծառ և ուրախ կլինի. Լիլիթ Տոնականյան

Շիրակի մարզից՝ երիտասարդ նկարիչ Լիլիթ Տոնականյանի երազանքն իրականություն է դառնում։ Նրա թվով չորրորդ անհատական ցուցահանդեսը տեղի է ունենալու այսօր՝ Հայաստանի Նկարիչների միությունում։ 7 տարեկանից ստեղծագործական գործունեություն ծավալող նկարչուհին ստեղծել է բացառապես պայծառ գույներով աշխատանքներ, ինչն էլ արժանացել է Ամերիկայի «ՀԱՅ-ԵՄ» բարեգործական հիմնադրամի ուշադրությանը և  աջակցությանը։ Արդյունքում, հիմնադրամի հովանավորությմաբ, Նկարիչների միությունում տեղի կունենա նկարչուհու անհատական ցուցահանդես-վաճառքը։

Լիլի՛թ, ինչպե՞ս են ծնվում Ձեր ստեղծագործությունները և ո՞րն է հիմնական թեման։

Քանի որ իմ ընկերը, իմ մուսան բնությունն է՝ հիմնականում թեման վերցնում եմ բնությունից։ Նկարում եմ բնապատկերներ, ծաղիկներ, նաև աբստրակտ ոճի գործեր ունեմ։ Սիրում եմ ծաղիկներ նկարել, քանի որ չեմ ցանկանում՝ դրանք թառամեն և մարդկանց փորձում եմ ժպիտներ հաղորդել դրանց միջոցով։ Մարդիկ, ինձ ճանաչողները, երբ հեռվից ծաղիկները տեսնում են՝ ասում են այս վառ գույներով աշխատանքը հաստատ Լիլիթինն է։ Նկարներս ծնվում են, երբ բարձր տրամադրություն եմ ունենում։ Եթե տրամադրություն չեմ ունենում՝ չեմ նկարում, քանի որ չեմ սիրում մռայլ գույներ։ 

Ինչպե՞ս ստացվեց, որ Նկարիչների միությունում անհատական ցուցահանդես եք ունենալու:

Հայաստանում այլ ցուցահանդեսներ ունեցել եմ։ Իմ աշխատանքները ցուցադրվել են նաև արտասահմանում։ Իսկ Նկարիչների միությունում ցուցահանդես-վաճառքը հովանավորում է Ամերիկայի «Hi-Am» ,«ՀԱՅ-ԵՄ» բարեգործական հիմնադրամը, որը համացանցում տեսել և հավանել է աշխատանքներս։ Նրանք նույնիսկ հարցրել են՝ ինչպե՞ս է ստացվում ՝ ապրում ես Հայաստանում և այդքան պայծառ ես տեսնում շուրջդ։ Բայց այժմ հույս կա, որ Հայստանն էլ նկարներիս նման պայծառ և ուրախ կլինի։ 

Նշեցիք, որ ցուցահանդեսներ եք ունեցել Հայաստանում։ Ինչպիսի՞ն է հայ հասարակության վերաբերմունքը արվեստի հանդեպ և ովքե՞ր են սովորաբար գնում Ձեր նկարները:

Արվեստի, մշակույթի նկատամամբ մարդկանց վերաբերմունքը փոխվել է։ Յուրաքանչյուր ցուցահանդեսի ժամանակ դա նկատելի է։ Իհարկե, վաճառքը դժվար է մեր պայմաններում, բայց մարդիկ գնահատում են արվեստը։ Երիտասարդների և հատկապես մեծահասակների սերն ու վերաբերմունը արվեստի նկատմամբ՝ երևում է։ Նկարների հիմնական գնորդները դրսում ապրող հայերն են, քանի որ ցանկանում են Հայաստանից մի փոքր շունչ ունենալ իրենց բնակարաններում։

Ո՞րն է Ձեր խորհուրդը սկսնակ նկարիչներին

Ունենան մեծ սեր, նվիրվեն իրենց աշխատանքին և չկոտրվեն խոչընդոտներից։ Նկարչին առաջին հերթին ուժ, եռանդ և շատ աշխատանք է պետք, քանի որ միայն շատ աշխատանքի արդյունքում է հնարավոր հասնել երազանքին։ Եվ ամենակարևորը՝ յուրաքանչյուր նկարիչ պետք է ունենա հավատ սեփական աշխատանքի նկատմամբ։

Արմինե Արմենակյան