ՀԱԿ անդամ Զոյա Թադևոսյանի հայտարարությունը Ստեփանակերտը դավաճանություն է համարում, ՀԱԿ-ը նշում` դա կուսակցության տեսակետը չէ

Արցախի նախագահի մամուլի քարտուղար Դավիթ Բաբայանը Հայ ազգային կոնգրեսի անդամ Զոյա Թադևոսյանի հայտարարությունը ազգային շահերին քաղաքական դավաճանություն է համարել: Այս մասին Բաբայանը ասել է «News.am»-ին տված հարցազրույցում:

«Նշված տիկնոջը լսելով՝ տպավորություն է ստեղծվում, որ մեր առջեւ ոչ թե հայկական կուսակցության ներկայացուցիչ է, այլ Ադրբեջանի նախագահի աշխատակազմի: Զարմանալի է, որ հասարակության մեջ մարդիկ կան, որոնք նման կարծիք են հայտնում: Սա սարսափելի է: Սա ազգային շահերին քաղաքական դավաճանություն է, բարոյական դեգրադացիայի դրսեւորում»,- նշել է Դավիթ Բաբայանը:

Հուլիսի 31-ին տեղի ունեցած մամուլի ասուլիսում «Հայ Ազգային կոնգրես» կուսակցության անդամ Զոյա Թադևոսյանը Արցախի ազատագրված տարածքների վերաբերյալ հայտարարել էր, թե դրանք ադրբեջանական տարածքներ են:

«Արցախյան պատերազմում ազատագրված տարածքները Արցախի տարածքները չեն: Դրանք ազատագրված են մեր բնութագրմամբ։ Ըստ էության, դուք լավ գիտեք, և այս լսարանում բոլորն էլ հասկանում են, որ դրանք գրավյալ տարածքներ են: Դրանք պետք է վերադարձնել Ադրբեջանին, եթե հիմնախնդրի լուծումը դա է պահանջում»,- ասել էր Զոյա Թադևոսյանը:

Բաբայանն անդրադարձել է նաև Թադևոսյանի այն ենթադրությանը, թե հակամարտության կարգավորումը հնարավոր է, եթե Ադրբեջանին վերադարձվեն այն տարածքները, որոնք բուն հայկական չեն:

«Ի պատասխան Ադրբեջանի ագրեսիայի՝ մենք ստիպված էինք ազատագրել հայկական պատմական հողերը: Հակառակ պարագայում՝ Ղարաբաղի ժողովրդին բնաջնջում էր սպառնում: Իմանալով, թե ինչով է սպառնում Արցախի անվտանգության համակարգի թուլացումը՝ ոչ միայն հանրապետության, այլեւ Հայաստանի եւ ամբողջ հայության համար անթույլատրելի է նման հայտարարություններ անելը: Մնում է միայն հույս ունենալ, որ այդ հայտարարության հեղինակի գլխի հետ մի բան այնպես չէ: Հակառակ դեպքում անհրաժեշտ է իրադարձությունների նման զարգացում թույլ չտալ»,- շեշտել է Արցախի նախագահի մամուլի քարտուղարը:

Դավիթ Բաբայանը նաև նշել է, որ Ադրբեջանն, ըստ էության, իրեն ավելի ազնիվ է պահում՝ բացահայտ հայտարարելով Արցախը ոչնչացնելու մտադրության մասին, իսկ նման անձանց հայտարարությունները արդարացում չունեն:

Զոյա Թադևոսյանի հայտարարությանն անդրադարձել է նաև ՀԱԿ-ի խոսնակ Արման Մուսինյանը:

«Զոյա Թադևոսյանն արտահայտել է իր անձնական կարծիքը, որը Կոնգրեսի դիրքորոշումը չէ»,- «Ilur.am»-ի փոխանցմամբ` ասել է Մուսինյանը: