Աշտարակում 45-ամյա տղամարդը «Կալաշնիկով» ավտոմատով սպանել է ընկերոջը՝ կնոջ հասցեին «քֆուր» տալու համար

«Առաջին լրատվական»-ը գրում է.

Արագածոտնի մարզի ընդհանուր իրավասության դատարանում Սուրեն Մնոյանի նախագահությամբ ավարտվել է Արա Նազարյանի գործի դատական քննությունը:

45-ամյա Արա Նազարյանին մեղադրանք էր առաջադրվել դիտավորյալ սպանության և ապօրինի հրազեն ձեռք բերելու, պահելու համար՝ ՀՀ քրեական օրենսգրքի 104 հոդվածի 1-ին և 235 հոդվածի 1-ին մասերով:

Ըստ մեղադրանքի՝ 2017 թվականի ապրիլի 10-ին Արա Նազարյանն ապօրինի ձեռք է բերել ու կրել հրազեն հանդիսացող «ԱԿ- 74» տեսակի և «ԱԿՍ- 74» տեսակի, 5,45 մմ տրամաչափի երկու ինքնաձիգ, ընդհանուրը՝ 66 հատ փամփուշտներ՝ լիցքավորված երկու փամփշտատուփերում, ինչպես նաև հրազեն հանդիսացող «Մակարով» տեսակի ատրճանակ՝ իր 9 մմ տրամաչափի փամփուշտներով:

Նույն օրը, ժամը 21-ի սահմաններում Արա Նազարյանը, ըստ մեղադրանքի, «ԱԿ-74» ինքնաձիգից արձակված կրակոցներով կյանքից զրկել է Հարություն Մ.-ին:

Ըստ մեղադրանքի՝ 2017 թվականի ապրիլի 10-ին, ժամը 13-ի սահմաններում Արա Նազարյանը Աշտարակի «Խաչմերուկ» կոչվող վայրում հանդիպել է ընկերոջը՝ գործով տուժող Հարություն Մ.-ին ու նստել է վերջինիս վարած «ՎԱԶ- 2107» մեքենան: Մեքենայի մեջ Հարություն Մ.-ն անհասցե հայհոյանքներ է տվել, ինչի պատճառով վիճաբանություն է եղել նրա ու Արայի միջև:

Նրանք մեքենայով մեկնել են Աշտարակում գտնվող՝ Հարություն Մ.-ի հորեղբորորդուն պատկանող վագոն-տնակի մոտ: Արան իջել է մեքենայից ու մտել է վագոն-տնակ, իսկ Հարությունը մեքենայով հեռացել է: Կարճ ժամանակ անց Արա Նազարյանը պատահական տաքսիով գնացել է խանութ, գնել է մեկ շիշ «Մանե» կոնյակ: Ժամը 15-ի սահմաններում վերադառնալով հիշյալ վագոն-տնակ, նա կոնյակ է խմել:

Երեկոյան մեքենայով վագոն-տնակին է մոտեցել Հարություն Մ.-ն: Նա վագոն-տնակ է տեղափոխել պարկի մեջ դրված երկու՝ վերը հիշատակված ինքնաձիգերը, դրանց փամփուշտներով լիցքավորված երեք փամփշտատուփերը:

Ըստ մեղադրանքի՝ Արան ու Հարությունը շարունակել են վիճել, վեճը վերածվել է քաշքշուկի: Արա Նազարյանը, ըստ մեղադրանքի, լինելով ալկոհոլի ազդեցության տակ, Հարություն Մ.-ին կյանքից զրկելու դիտավորությամբ պարկից հանել է «ԱԿ-74» առանց խզակոթի ինքնաձիգը, դրանից կրակոցներ է արձակել վագոն-տնակի մուտքի մոտ կանգնած Հարությունի ուղղությամբ: Ստացած հրազենային բազմաթիվ վնասվածքներից Հարություն Մ.-ն տեղում մահացել է:

Սպանությունից հետո, ըստ մեղադրանքի, Արա Նազարյանը հանցագործության գործիք ինքնաձիգը, ինչպես նաև վագոն-տնակում գտնվող մյուս ինքնաձիգը՝ իրենց փամփշտատուփերով, տեղափոխել է «ՎԱԶ-2107» մեքենան:

Հարություն Մ.-ի գոտկատեղում նկատելով «Մակարով» ատրճանակ՝ Արա Նազարյանը այն վերցրել ու պահել է իր մոտ և դեպքի վայրից փախել է, բայց Աշտարակի Ն. Աշտարակցու փողոցում ավտովթարի է ենթարկվել, երկու լիցքավորված ինքնաձիգերը թողել է մեքենայի մեջ և հեռացել է վթարի վայրից:

2017 թվականի ապրիլի լույս 11-ին, ժամը 1-ի սահմաններում Արա Նազարյանը պատահական տաքսիով մեկնել է Երևան քաղաքի Սիլիկյան թաղամասում գտնվող ծանոթի՝ Արտակի մոտ: Մինչև նրա ընկերուհու տուն հասնելը՝ Աշտարակ-Երևան ճանապարհին նա, իջնելով տաքսուց, դաշտում օդ է կրակել ու դատարկել է իր մոտ եղած ատրճանակի փամփշտատուփը:

Հասնելով Արտակի ընկերուհու տուն, Արա Նազարյանը գաղտնի ատրճանակն ու դատարկ փամփշտատուփը պահել է հյուրասենյակի բազմոցի ծածկոցի տակ, ապա հեռացել է այդ տանից ու վերադարձել է Աշտարակի ավտոկայան: Այնտեղ նա հայտնաբերվել ու բերման է ենթարկվել:

Առաջադրված մեղադրանքում Արա Նազարյանն իրեն մեղավոր է ճանաչել ու հայտնել է, թե Հարություն Մ.-ին ճանաչել է երկար տարիներ, բայց մտերմություն արել է դեպքից 3-4 ամիս առաջ: Հարությունը վարել է «ՎԱԶ-2107» մեքենա: Այն պարբերաբար վարել է նաև ինքը: Հարությունն ապրել է Աշտարակին հարակից այգիներում՝ «Արենդ» կոչվող տարածքում տեղադրված վագոն-տնակում, որը նրա հորեղբորորդուն էր պատկանում:

2017 թվականի ապրիլի 10-ին, ժամը 13 –ի սահմաններում Աշտարակի «Թուրքի քուչա» կոչվող խաչմերուկում հանդիպել է Հարությունին, վերջինս մեքենայով էր: Մեքենայի մեջ Հարությունը վերացական հայհոյանքներ է տվել, ինքը դիտողություն է արել, իրենք վիճել են այդ պատճառով: Հետո Հարությունն իրեն տարել է «Արենդ» կոչվող տարածք՝ վագոն-տնակի մոտ, ու հեռացել է: Ինքը մտել է վագոն-տնակ, որոշ ժամանակ հետո դուրս է եկել, տաքսիով գնացել է խանութ, կոնյակ է գնել ու վերադարձել է վագոն-տնակ: Կոնյակ է խմել, ժամանակ է անցկացրել:

Մթնշաղին եկել է Հարությունը՝ մեքենայով: Մեքենան կայանել է խաղողի վազերի հետևում, մեքենայից դուրս է բերել պարկի մեջ դրված երկու «Կալաշնիկով» ավտոմատներ, բերել- դրել է սենյակի մահճակալի մոտ: Ինքը մոտեցել է զենքերին, վերցրել է դրանցից մեկը, որը առանց խզակոթի ավտոմատ էր՝ փամփշտատուփը՝ վրան: Պարկում կային ևս մեկ ավտոմատ ու երկու փամփշտատուփ:

Հարությունն անջատել է վագոն-տնակի լույսը, մոմ է վառել ու ասել է, թե պետք չի, որ փողոցից երևան տնակի լույսերը: Ինքը շարունակել է կոնյակ խմել, իսկ Հարությունը թեյ է խմել: Կեսօրին սկսված իրենց վեճը շարունակվել և թեժացել է, վերածվել է հրմշտոցի: Ինքը որոշել է հեռանալ այդտեղից, բայց Հարությունը հայհոյել է իր կնոջը: Ինքը բարկացել, «հուներից դուրս է եկել» և, լինելով ալկոհոլի ազդեցության տակ, հետ է դարձել, սկսել են իրար քաշքշել:

Ինքը գնացել է հարևան սենյակ վերցրել է «Կալաշնիկով» ավտոմատը, լիցքավորել է: Հարությունն այդ պահին խոհանոցում էր՝ մուտքի դռան մոտ՝ իր առաջ: Ինքը կրակահերթով կրակել է նրա վրա: Նա տեղում մահացել է՝ ընկնելով տնակի հատակին:

Ինքը նկատել է նրա գոտկատեղում դրված «Մակարով» ատրճանակը, վերցրել, դրել է իր գոտկատեղը, վերցրել է նաև երկու ինքնաձիգերը՝ իրենց փամփշտատուփերով, երրորդ փամփշտատուփը շտապելու պատճառով թողել է պարկի մեջ: Ինքնաձիգերն ու փամփշտատուփերը տարել, դրել է Հարությունի մեքենայի մեջ, այդ մեքենայով դեպքի վայրից փախել է: Սակայն Աշտարակի Ն. Աշտարակեցու փողոցում վթարի է ենթարկվել: Երկու ավտոմատներն ու փամփշտատուփերը թողել է մեքենայի մեջ, պատահական մեքենայով գնացել է եղբոր սանիկի՝ Արտակի՝ Երևանում գտնվող տուն՝ նպատակ ունենալով այնտեղ պահել ատրճանակը:

Քանի որ Արտակը մանկահասակ երեխա ունի, ինքը անվտանգության նկատառումներով նրա տուն չհասած՝ դաշտում ատրճանակի բոլոր փամփուշտները կրակել է օդ: Արտակի տանը մնացել է մի քանի ժամ: Ատրճանակը նրանից գաղտնի պահել է բազմոցի սավանի տակ ու հեռացել է, վերադարձել է Աշտարակի ավտոկայան, որտեղ ոստիկանները իրեն բռնել ու բերման են ենթարկել:

Մանրամասները՝ ԱՅՍՏԵՂ: