«Wikileaks-ում իմ անունն էլ է տրվել. Չի կարելի գլխի վրա շուռ տալ իրավիճակը»

Սահմանադրական դատարանի նախկին անդամ Կիմ Բալայանը սպասում է, որ նախկին փոխվարչապետ Արմեն Գևորգյանին մեղադրանք առաջադրելու գործով նաև իրեն են հրավիրելու Հատուկ քննչական ծառայություն՝ հարցաքննության: Wikileaks-ի հայտնի փաստաթուղթում, որի հիման վրա Արմեն Գևորգյանին մեղադրանք է առաջադրվել արդարադատության իրականացմանը խոչընդոտելու համար, նաև Կիմ Բալայանի անունն է հիշատակվում, թե նա համագործակցել է իշխանությունների հետ: 

Նշենք, որ Արմեն Գևորգյանին մեղադրանք առաջադրելու համար հիմք է հանդիսացել ՍԴ նախկին անդամ Վալերի Պողոսյանի զրույցը ԱՄՆ դասպանատան աշխատակիցների հետ: Wikileaks կայքը գաղտնազերծել էր Հայաստանում ԱՄՆ փոխդեսպան Ջոզեֆ Փենինգթոնի՝ 2008 թվականի մարտի 7-ին ԱՄՆ Պետդեպ ուղարկված նամակը: Ըստ այդմ՝ ՍԴ նախկին անդամ Վալերի Պողոսյանը 2008 թվականի մարտի 6-ի ուշ երեկոյան գաղտնի դիմել էր ԱՄՆ դեսպանատան ներկայացուցիչներին` իր տանը շտապ առանձնազրույց կազմակերպելու խնդրանքով: Նա ահազանգել էր, որ նախագահի աշխատակազմից իր վրա ճնշումներ են գործադրվում, որպեսզի հօգուտ Սերժ Սարգսյանի որոշում կայացվի: Վալերի Պողոսյանը նաև հայտնել էր, որ ՍԴ դատավորներից Կիմ Բալայանը համագործակցել է իշխանությունների հետ:

Lragir.am-ի հարցին ի պատասխան, թե նախագահական նստավայրից ՍԴ անդամների վրա ի՞նչ ճնշումներ էին գործադրվում այդ օրերին, Կիմ Բալայանը պատասխանեց. «Այդ հարցով ես չեմ կարող անկողմնակալ լինել: Քննություն է գնում, Wikileaks-ում իմ անունն էլ է տրվել, որ ես իբրև համագործակցել եմ իշխանության հետ: Ես դեռ չեմ ուզում այդ մասին խոսել, որովհետև չեմ բացառում, որ ինձ էլ քննության կկանչեն»:

Ըստ Կիմ Բալայանի՝ իրականությունը խեղաթյուրվել է: «Միայն մի բան կարող եմ ասել՝ չի կարելի գլխի վրա շուռ տալ իրավիճակը»,- հավելեց նա: