Չեռնոգորիան քաղաքացիություն կտրամադրի տնտեսության մեջ ներդրում կատարելու դիմաց

Չեռնոգորիայի կառավարությունը հոկտեմբերի 1-ից սկսել է կյանքի կոչել պետության տնտեսության մեջ ներդրում կատարելու դիմաց քաղաքացիության տրամադրման ծրագիրը: Այս մասին հայտնում է ՏԱՍՍ-ը՝ հղում անելով Չեռնոգորիայի Գյուղատնտեսության և համայնքների զարգացման նախարարությանը:

Ծրագիրը հաշվարկված է երեք տարվա համար, որի ընթացքում Չեռնոգորիայի քաղաքացիություն ստանալ ցանկացողները պետք է 250 հազար եվրո ներդնեն երկրի ոչ զարգացած համայնքներից մեկում կամ 450 հազար եվրո՝ երկրի տնտեսապես զարգացած հատվածում: Բացի այդ, կառավարությունը յուրաքանչյուր հայտի համար գանձելու է ևս 100 հազար եվրո: Այդ գումարները փոխանցվելու են թերզարգացած համայնքների զարգացման հատուկ հիմնադրամին:

Չեռնոգորիայի քաղաքացիները կարող են այցելել աշխարհի 120 երկիր, առանց վիզայի անհրաժեշտության, այդ թվում նաև շենգեն գոտու երկրներ:

Ավելի վաղ նշվել էր, որ այս ճանապարհով կառավարությունը ցանկանում է պետական բյուջեն ավելացնել 4.8 մլրդ դոլարով: