Իսրայելում կոչ են անում հետևել ԱՄՆ-ում քվեարկության օրինակին և ճանաչել Հայոց ցեղասպանությունը

Իսրայելի նշանավոր քաղաքական գործիչներից երկուսը կոչ են արել երկրի իշխանություններին ճանաչել Հայոց ցեղասպանությունը՝ հետևելով ԱՄՆ-ի Ներկայացուցիչների պալատի օրինակին:  

Այս մասին գրում է «The times of Israel»-ը՝ նկատելով, որ ողջույններ ու ծափահարություններ հնչեցին հոկտեմբերի 29-ին ԱՄՆ Ներկայացուցիչների պալատում քվեարկությունից հետո, երբ 405 կողմ, 11 դեմ ձայներով ընդունվեց «Հաստատելով Հայոց ցեղասպանության վերաբերյալ Միացյալ Նահանգների արձանագրությունները» խորագրով բանաձևը: Այն բացառիկ էր ԱՄՆ Կոնգրեսում, որտեղ տարբեր ձևակերպումներով նախագծեր դրվել էին շրջանառության մեջ, բայց երբեք չէին ընդունվել:   

Իսրայելական անգլալեզու օնլայն թերթի հոդվածագիրը նկատում է, որ հոկտեմբերի 29-ը, երբ Թուրքիան նշում է Հանրապետության օրը, այսուհետ կմնա պատմության մեջ նաև ԱՄՆ Ներկայացուցիչների պալատում Թուրքիայի դեմ երկու նախագծերի ընդունմամբ. մյուսը այդ երկրի նկատմամբ պատժամիջոցների կիրառման օրինագիծն էր: Այս ամենը տեղի էր ունենում Թուրքիայի կողմից Սիրիայի հյուսիսարևելյան հատված ներխուժումից և այդ տարածքներն իրենց վերահսկողության տակ վերցրած քրդերի վրա հարձակումից երեք շաբաթ անց:

«ԱՄՆ Ներկայացուցիչների պալատի կողմից Հայոց ցեղասպանության ճանաչման քվեարկությունն ուղղված էր պատմական արդարությանն ու ճշմարտությանը: Թուրքիային չպետք է թույլ տալ՝ ահաբեկել աշխարհը՝ կորզելով ցեղասպանության ժխտում»,-նշել է «Կապույտ և սպիտակ» կուսակցական դաշինքի առաջնորդներից Յաիր Լապիդը, ով իր «Yesh Atid» կուսակցությամբ բազմիցս բարձրացրել է Կնեսետի կողմից Հայոց ցեղասպանության ճանաչման հարցը: «Ես կշարունակեմ Իսրայելի կողմից Հայոց ցեղասպանության ճանաչման ուղղությամբ իմ պայքարը»,-ընդգծել է Լապիդը: Նա այս տարվա ապրիլին խոսել էր Իսրայելի «բարոյական և պատմական պատասխանատվության» մասին՝ նշելով, որ ժամանակն է իր երկրի կառավարության համար ճանաչելու Հայոց ցեղասպանությունը և դադարեցնելու Թուրքիայի ճնշումներին դիմակայելու քաղաքականությունը:

The US House of Representatives vote to recognize the Armenian Genocide is a vote for historical truth and justice. Turkey cannot be allowed to intimidate the world into denying genocide. 

I will continue to fight for Israeli recognition of the Armenian Genocide.

— יאיר לפיד Yair Lapid (@yairlapid) October 30, 2019

Իսրայելի ներքին գործերի նախկին նախարար Գիդեոն Սաարը՝ դաշինքի մեջ մտնող «Լիկուդ» կուսակցությունից, նույնպես ճանաչման կոչ է արել՝ ողջունելով ԱՄՆ Ներկայացուցիչների պալատի բարոյական և սկզբունքային կեցվածքը: «Իսրայելը ևս պետք է հստակ ճանաչի այս սարսափելի վայրագությունները»,-նշել է Սաարը՝ օգտագործելով #genocide (ցեղասպանություն) հեշթեգը:  

I welcome the moral and principled stance of the US House of Representatives in recognizing the mass killing of #Armenians 100 years ago as #genocide. Israel should make similarly clear its recognition of this terrible atrocity.

— גדעון סער (@gidonsaar) October 30, 2019

Իսրայելի Կնեսետում բազմիցս բարձրացվել է Հայոց ցեղասպանության ճանաչման հարցը: Այն 2016-ին հավանության է արժանացել խորհրդարանի կրթության հարցերի հանձնաժողովում: Այդ թեմային անդրադարձել է նաև երկրի նախագահ Ռեուվեն Ռիվլինը՝ բարձրաձայնելով անգամ ՄԱԿ-ի ամբիոնից: