Ես ձեզ հետ եմ իմ նախագահության առաջին իսկ օրից. Թրամփը՝ Իրանի ժողովրդին

ԱՄՆ-ի նախագահ Դոնալդ Թրամփը փարսերեն եւ անգլերեն մի քանի թվիթ է գրել՝ ի աջակցություն Իրանում բողոքի ցույցի, որն անցկացվել է ուսանողների կողմից Թեհրանի մերձակայքում խոցված ինքնաթիռի փաստի կապակցությամբ։

«Իրանի խիզախ, բազմաչարչար ժողովրդին․ ես ձեզ հետ եմ իմ նախագահության առաջին իսկ օրից, եւ իմ վարչակազմը շարունակում է ձեր կողքին լինել։ Մենք անմիջականորեն հետեւում ենք ձեր բողոքի ցույցերին եւ ոգեշնչվում ձեր խիզախությամբ»,-գրել է նա թվիթերյան իր էջում։

Իր մեկ ուրիշ թվիթում ԱՄՆ-ի նախագահը դիմել է Իրանի կառավարությանը՝ պահանջելով մարդու իրավունքների պաշտպանությամբ զբաղվող կազմակերպություններին թույլ տալ հետեւել բողոքի ցույցերի շուրջ զարգացող իրավիճակին։

«Իրանի կառավարությունը պետք է թույլ տա մարդու իրավունքների կազմակերպությունների հետեւել եւ զեկուցել դեպքի վայրից իրանցի ժողովրդի բողոքի ցույցերի ժամանակ։ Չի կարող տեղի ունենալ ո՛չ ցուցարարների նկատմամբ հերթական վրեժը, ո՛չ Ինտերնետի անջատումը։ Մենք հետեւում ենք»,-գրել է Դոնալդ Թրամփը։

Հիշեցնենք, որ Իրանի մայրաքաղաք Թեհրանում հարյուրավոր ուսանողներ փողոց են դուրս եկել բողոքելու իշխանությունների դեմ այն բանից հետո, երբ Իսլամական հեղափոխության պահապանների կորպուսն ստանձնեց Ուկրաինական ավիաուղիների Բոինգ ինքնաթիռը սխալմամբ խոցելու պատասխանատվությունը: 

Ցուցարարները հակառակավարական կոչեր են հնչեցրել, պահանջել են երկրի առաջնորդ Ալի Խամենեիի հրաժարականը: