Աբխազիայի խորհրդարանը հաստատել է նախագահի պաշտոնից Խաջիմբայի հրաժարականը

Աբխազիայի խորհրդարանը բավարարել է նախագահի պաշտոնից Ռաուլ Խաջիմբայի հրաժարականի դիմումը, հաղորդում է ՌԻԱ Նովոստին: Այս մասին գործակալությանը հայտնել է երկրի խորհրդարանի խոսնակ Վալերի Կվարչիան:

Երկուշաբթի Աբխազիայի խորհրդարանը նստաշրջան է սկսել, որի ժամանակ հաստատել է Խաջիմբայի հրաժարականը, նիստերի դահլիճում ներկա են եղել 35 պատգամավորների 34-ը:

«Ռաուլ Խաջիմբայի հրաժարականի դիմումն ընդունվել է»,- ասել է Կվարչիան: Նրա խոսքով՝ կողմ է քվեարկել 32 պատգամավոր, դեմ՝ 2-ը:

Հիշեցնենք, որ հունվարի 9-ին Սուխումում ցուցարարները պահանջել են նախագահի հրաժարականը՝ ներխուժելով նրա վարչակազմի շենք: Երկրի խորհրդարանն արտահերթ նիստի ժամանակ ընդունել է հրաժարական տալու կոչով նախագահին ուղղված դիմումը: Հունվարի 10-ին Աբխազիայի Գերագույն դատարանը չեղարկել է նախագահական ընտրությունների արդյունքների մասին երկրի ԿԸՀ որոշումն ու նոր ընտրություններ նշանակել: Նոր ընտրություններ են նշանակվել մարտի 22-ին:

Կիրակի Աբխազիայի փոխնախագահ Ասլան Բարցիցը հայտարարել է, որ նախագահը ստորագրել է հրաժարականի մասին փաստաթուղթը՝ արնահեղությունից խուսափելու համար: