Ավտոբուս` պաշտոնի դիմա՞ց. արդյոք Երևանի նոր ավտոբուսներով կոռուպցիոն շղթա է բացահայտվում

Վերջին շրջանում ներքաղաքային տրանսպորտում նոր ավտոբուսներ են հայտնվել։ Խոսքը, մասնավորապես, 26 համարի երթուղին սպասարկող 2 ավտոբուսի մասին է։ Ըստ մամուլի հրապարակումների՝ դրանք սեփականության իրավունքով պատկանում են «Բասվոյաժ» ընկերության սեփականատեր, համատեղության կարգով Նորք-Մարաշ վարչական շրջանի ղեկավար Հովհաննես Մանուկյանին: Պարզելու համար, թե որքա՞ն ժամանակ է ինչ շահագործվում են ավտոբուսները, քանի՞ ավտոբուս է սպասարկում իրականացնում, արդյո՞ք կոռուպցիայի մասին չի խոսում այն, որ բիզնեսմենը նշանակվել է պաշտոնի, այս և այլ հարցերի շուրջ ԼՈՒՐԵՐ․com-ը զրուցեց Հովհաննես Մանուկյանի հետ։ 

«Ընդհանուր թվով 3 ավտոբուս կա, բայց քանի որ 26 համարի գծում 2 ավտոբուսի տեղ կա, այս պահին աշխատում է երկուսը։ 26 համարի գծի սեփականատիրոջ հետ ձեռք ենք բերել համաձայնություն և դեռ ժամանակավոր ու  փորձնական այդ գծում քշում են: Չեմ կարող ասել՝ մեկ ամիս հետո ինչ կլինի»,- նշեց նա։ 

Նկատենք, որ Մանուկյանը վարչական շրջանի ղեկավարի պաշտոնում նշանակվել է անցյալ տարվա սեպտեմբերին, հենց այն ժամանակ, երբ այդ 2 ավտոբուսներն սկսել են շահագործվել։ Մանուկյանը փորձեց բացառել տեսակետները, թե ավտոբուսները կարող էին լինել պաշտոնի նշանակման վարձքը և կոռուպցիոն ռիսկ համարվել։

Դեռևս օգոստոս ամսին, երբ փորձարկվում էր ավտոբուսը, որի սպասարկումն իրականացնում էր Մանուկյանը, նշել էր, թե 100 դրամով նմանատիպ բարձրորակ երթուղայիններ ունենալ չենք կարող, հետևաբար հարկավոր է վարձը սարքել 150 դրամ։ Հետաքրքրվեցինք՝ ամիսներ են անցել, շարունակո՞ւմ է մնալ այդ կարծիքին։ «Այս պահին այդ հարցին չեմ կարող պատասխանել, որովհետև սեպտեմբեր ամսից ընկերությունը հավատարմագրային ծառայությամբ հանձնել եմ իմ ընկերոջը։ Իրենք որոշեցին, որ պետք է գազով մեքենա բերեն, հիմա էլ գազով ավտոբուսներն են փորձարկում և ուզում են մոնիտորինգ անել, որ տեսնեն՝ ինչքանով է ձեռնտու»,- ասաց Մանուկյանը։

Այսինքն, «Բասվոյաժն» այլևս իրեն չի՞ պատկանում՝ ի պատասխան Մանուկյանն ասաց․ «Ես հիմնադիրն եմ, բայց ինքս չեմ տնօրինում»։ Անդրադառնալով «ավտոբուս՝ պաշտոնի դիմաց» իր անվան շուրջ պտտվող ձևակերպմանը՝ Մանուկյանը նշեց, որ ինքը քաղաքապետարանին ավտոբուս չի նվիրել և դա իր համար վիրավորական է․ «Եթե ես նվեր եմ տվել, պետք է համապատասխան փաստաթղթեր լինեն, հենց էնպես ասելով չէ։ Ավտոբուսներն ունեն տեխանձնագիր, որտեղ նշված է, որ 26 համարի ավտոբուսները պատկանում են ոչ թե «Բասվոյաժ», այլ՝ «Բասլենդ» ընկերությանը, որի հիմնադիր տնօրենը 2012 թվականից իմ ընկերն է՝ Տիգրան Սերգեյի Հարությունյանը։ Ես «Բասլենդ» ՍՊԸ-ի հետ 2012 թվականից կապ չեմ ունեցել, պարզապես Սերգեյ Հարությունյանն իմ ընկերն է, որին ես՝ որպես բիսնես ծրագրերով զբաղվող, օգնել եմ ժամանակին խորհուրդներով, թե ինչպես կարելի է աշխատել։ Հիմա էլ շարունակվում է մեր ընկերությունը։ Քաղաքի մի ծայրում կարող ես մի բան ասել, մյուս մասում այլ ձևով լսել, երևի թյուրըմբռնում է եղել։ Այդ մասին խոսելուց առաջ ոստիկանությունից հարկավոր էր ճշտել՝ ավտոբուսները իսկապե՞ս պատկանում են Բասվոյաժին, թե՞ այլ ընկերության»,- նշեց նա։ 

Ճշտող հարցին՝ այդ դեպքում ինչպե՞ս էր ստացվել, որ ավտոբուսները ամիսներ առաջ փորձարկելիս հենց ինքն էր սպասարկումն իրականացնում, Մանուկյանը պատասխանեց․ «Իմ ընկերոջ ընկերության ավտոբուսներն են, ես էլ աջակցում էի, ցույց էի տալիս՝ ինչպես կարելի է սպասարկում անել Երևան քաղաքում, դա իմ ոլորտն է, կարծում եմ՝ լավ ծառայություն եմ մատուցում և դա թաքցնել պետք չէ, կապ չունի, որ հիմա վարչական շրջանի ղեկավար եմ»,- ասաց Հովհաննես Մանուկյանը։

Սոնա Հարությունյան