«Արմավիրի մարզը սպանդանոցի խնդիր չունի»․ մարզպետը հակադարձում է բողոքներին

Հունվարի 15-ից ուժի մեջ մտած կառավարության որոշումը, ըստ որի` Հայաստանի ամբողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, մեծ դժգոհություն է առաջացրել անասնապահների շրջանում։ Այսօր առավոտից մի քանի մարզերում բողոքի ակցիաներ են իրականացվում՝ ուղեկցվելով փողոցներ փակելով: Անասնաբուծությամբ զբաղվողների դժգոհությունը կապված է իրենց բնակավայրերից սպանդանոցների հեռավորության, դրանց առաջարկած գների հետ: Նրանք պնդում են՝ սպանդանոցային մորթը պարտադիր դարձնելով իրենց զրկում է եկամուտից: 

ԼՈՒՐԵՐ․com-ի հետ զրույցում Արմավիրի մարզպետ Համբարձում Մաթևոսյանն ասաց, որ այս պահին բողոքող քաղաքացիները բացել են ճանապարհը․ «Ես չկարողացա հանդիպել ցուցարարների հետ, սակայն նրանց հետ հանդիպել են իմ տեղակալն ու մարզպետարանի գյուղատնտեսության և բնապահպանության վարչության պետը։ Ես հեռախոսազրույցի միջոցով փոխանցեցի, որ իրենց մտահոգություններին լավատեղյակ եմ և կարիք չկա ճանապարհ փակել, երբ իրենց ձայնը լսելի է։ Նրանց պահանջների մի մասն ընդունելի է, մյուս մասը՝ ոչ։ ԱԺ-ում պետք է լինեն քննարկումներ, հանդիպումներ ենք ունենում նաև կառավարության մեր գործընկերների հետ, որպեսզի համապարփակ որոշում ունենանք, հասկանանք՝ ինչպես կարող ենք հարցին լուծում տալ»,- ասաց Մաթևոսյանը։

Գյուղացիներին վրդովեցրել էր Արմավիրի մարզպետարանի գյուղատնտեսության և բնապահպանության վարչության պետ Արթուր Այվազյանի հայտարարությունը, որ Արմավիրի մարզը սպանդանոցի խնդիր չունի։ Մաթևոսյանը ևս պնդեց՝ հիմնավորելով, որ այս պահին մարզում գործում է 4 սպանդանոց, ինչպես նաև փոքր և միջին ներդրողների կողմից ստանում են դիմումներ, որ թույլտվություն ստանան և սպանդանոցներ կառուցեն․ «Արդեն իսկ 10 հայտ է ներկայացվել։ Խոշոր եղջերավոր անասունների համար կգործի նաև շարժական ծառայությունը, այսինքն պարտադիր չէ հասնել իքս քաղաք՝ սպանդանոցի ծառայությունից օգտվելու համար»,- նշեց մարզպետը։

Նրա խոսքով՝ առնվազն 2 շաբաթվա ընթացքում Արմավիրի մարզը չափանիշներին համապատասխանող բազմաթիվ սպանդանոցներ կունենա։ Մարզպետը նշեց, չնայած դրան՝ կապ են հաստատել սպանդանոցների սեփականատերերի հետ, որոնք վստահեցրել են, որ իրենց մոտ գերծանրաբեռնված չէ և հաճախորդների հերթեր չեն կուտակվում։

Անդրադառնալով ցուցարարների հայտարարությանը, թե սպանդանոցային մորթը բարձր գներով է արվում, մարզպետը հակադարձեց․ «Մարզպետարանի ներկայացուցիչն իրենց մոտից բարձրախոսով զանգահարել է սպանդանոց և հետաքրքրվել գների մասին։ Բանից պարզվեց, որ արժեքը նույնն է, իմ տեղեկություններում դա հենց այն գինն է, որը ցուցարարները պահանջում են․ եթե չեմ սխալվում խոսքը 2400-2600 դրամի մասին է։ Ցուցարարներին անհանգստացնում է, թե ինչ է լինելու հատուկ դրության դեպքում, երբ անասունի մորթն անհրաժեշտ լինի կամ մատաղ ցանկանան անել, մենք նշեցին, որ այդ դեպքերում թույլատրելի է, որը օրենքով ֆիքսված է»,- ասաց Արմավիրի մարզպետը։ 

Սոնա Հարությունյան