«ՈՉ»-ի դրոշը գետնին չի մնա. շտաբը կձևավորվի

Ապրիլի 5–ին նախատեսված սահմանադրական փոփոխությունների նախագիծը հանրաքվեի դնելու քարոզարշավը կմեկնարկի փետրվարի 17-ին և կավարտվի ապրիլի 3-ին։ Խորհրդարանական ընդդիմությունը անմասն կմնա քարոզարշավից. ԼՀԿ-ն ու ԲՀԿ-ն հանրաքվեի իրականացնումը համարում են հակասահմանադրական: Սակայն, մտավախությունը, թե «ՈՉ»-ի քարոզչական կողմ չի լինի, փարատվեց. իրավաբանների և իրավապաշտպանների մի խումբ հանդես կգա «ՈՉ»-ի դրոշակով, այս մասին հայտարարեց իրավապաշտպան Ռուբեն Մելիքյանը, ում հետ էլ զրուցել ենք իրենց հետագա անելիքների մասին:

«Մեր նախաձեռնությունը  իրավաբանների անունից է և իրավաբանների համար։ Որպես նախաձեռնող խմբի անդամ նախաձեռնության կարգով գրանցում ենք բացառապես իրավաբանների»:

Մելիքյանն ընդգծեց, որ նախաձեռնության իրականացման համար օրենքով սահմանված են 50 և ավել քաղաքացիներ, իսկ այդ թիվն իրենց համար խնդրահարույց չէ, որովհետև ցանկություն հայտնողների թիվն ավելին է: Մելիքյանն ու շատ այլ իրավապաշտպաններ ակտիվ քարոզչությամբ չեն զբաղվելու, այլ հարթակ են տրամադրելու մյուսներին:

«Մեր խնդիրները երեքն են՝ առաջինը, որ հարթակ ստեղծենք քարոզչություն իրականացնելու ցանկություն ունեցող կողմերի համար, որպեսզի հավասար հնարավորություն ունենա մեր հանրությունը լսելու և ունկնդրելու ինչպես կողմ, այնպես էլ ԱՅՈ-ն բացառող մյուս տեսակետները: Երկրորդը՝ վերահսկողական ռեսուրսներ ունեցող քաղաքացիներին հնարավորություն ենք տալու իրականացնել վերահսկողությունը, խոսքը գնում է վստահված անձերի, հանձնաժողովի անդամներ գրանցվելու մասին: Երրորդը՝ մեր խնդիրն ենք համարում լարված, շիկացած ու թշնամանքի այս մթնոլորտը նվազեցնելու, ցրելու աշխատանքներ իրականացնել: Մենք մտածում ենք, որ այս հանրաքվեն հակասահմանադրական է, և դա առաջին լուրջ հարվածն է մեր պետականությանը և մենք ցանկանում ենք այնպես անել, որ ռիսկերը հնարավորինս նվազեցվեն և դրան չգումարվի նաև անարդարությունը: Անարդարացիության խնդրի կբախվեինք, եթե «ՈՉ»-ի դրոշը գետնին մնար, և որևէ քաղաքացիական նախաձեռնություն չբարձրացներ»:

Մելիքյանը նշեց՝ քանի որ նախաձեռնությունը քաղաքացիական է, դրան կարող են միանալ ՀՀ քաղաքացիները, ոչ թե ինչ-որ կուսակցություններ կամ ուժեր:

«Մենք հարթակ ենք տրամադրելու բոլոր այն քաղաքացիներին, ովքեր չեն մտնելու ատելություն քարոզելու տիրույթ, չեն օգտագործելու ատելության բառամթերք: Հակառակ կողմից ակնկալում ենք նույն մոտեցումը»:

Անդրադառնալով խորհրդարանական ուժերի չեզոք կեցվածքին՝ Մելիքյանն ասաց, որ ԼՀԿ-Ն և ԲՀԿ-ն իրենց դիրքորոշումը հայտնել են քաղաքական տեսանկյունից, բայց և նա ըմբռնում է խորհրդարանական ընդդիմության ներկայացրած փաստարկները

«Այն փաստարկները, որոնք ներկայացրին այդ ուժերը, ինձ համար ընդունելի են և խիստ տրամաբանական»:

Առաջնորդվելով օրենքով սահմանված ժամկետով՝ նախաձեռնող կողմը երեքշաբթի օրը կդիմի ԿԸՀ՝ պաշտոնապես ձևավորելու «ՈՉ»-ի քարոզչական կողմը: