Ռուսաստանում կորոնավիրուսով պայմանավորված կարանտինը խախտելու համար 7 տարվա ազատազրկում է սպառնում․ ՏԱՍՍ

Պետդուման այսօր կայացած լիագումար նիստում ընդունել է մի օրենք, որը ամրացնում է քրեական պատասխանատվությունը սանիտարահամաճարակաբանական կանոնների խախտման համար: Փաստաթղթի հեղինակներն էին ստորին պալատի խոսնակ Վյաչեսլավ Վոլոդինը և Դումայի պետականաշինության և օրենսդրության հանձնաժողովի ղեկավար Պավել Կրաշենիննիկովը, գրում է tass.ru֊ն:

Համաձայն օրինագծի ՝ վարակված անձի կողմից համաճարակաբանական կանոնների խախտումը կպատժվի տուգանքով՝ առավելագույնը 1 միլիոն ռուբլի, կամ որոշակի պաշտոններ զբաղեցնելու, որոշակի գործունեությամբ զբաղվելու իրավունքից զրկելով մինչև 3 տարի ժամկետով կամ ազատազրկմամբ՝ մինչև 7 տարի ժամկետով:

Այս օրենքը սահմանվում է Ռուսաստանի Դաշնության Քրեական օրենսգրքի 236 հոդվածի հիման վրա, այն է՝ եթե նման  խախտումը, որը անզգուշությամբ առաջացնում է զանգվածային հիվանդություն կամ մարդկանց թունավորում, պատժվում է տուգանքով՝ առավելագույնը 80 հազար ռուբլի, կամ պարտադիր աշխատանքով՝ առավելագույնը 360 ժամ, կամ ուղղիչ աշխատանքով՝ մինչև մեկ տարի, կամ նույն ժամկետով ազատության սահմանափակմամբ: Միևնույն ժամանակ, նույն գործողությունը, որը ենթադրում է անձի անզգուշությամբ մահվան պատճառ, նախատեսում է պատասխանատվություն պարտադիր աշխատանքի տեսքով մինչև 480 ժամ, կամ ուղղիչ աշխատանք ՝ վեց ամսից երկու տարի, կամ հարկադիր աշխատանք մինչև հինգ տարի կամ նույն ժամկետով ազատազրկում:

Այսօր Դուման քննարկում է օրինագծերի մի փաթեթ, որի նպատակն է մեղմացնել կորոնավիրուսային պանդեմիայի հետևանքները քաղաքացիների և բիզնեսի համար, ինչպես նաև խստացնել քրեական և վարչական պատասխանատվությունը` կարանտինային ռեժիմը խախտելու և գիտակցաբար կեղծ տեղեկություններ տարածելու համար: