Թրամփը մեկնաբանել է Կիմ Չեն Ընի «վերադարձը»․ Թվիթեր

ԱՄՆ նախագահ Դոնալդ Թրամփը հայտարարել է, որ ուրախ է, որ նորից առողջ է տեսնում ԿԺԴՀ առաջնորդ Կիմ Չեն Ընին, որը մոտ 20 օր չէր հայտնվել հանրության շրջանում, ինչը հիմք է տվել լրատվամիջոցներին նրա լրջորեն հիվանդ լինելու կամ նույնիսկ մահվան մասին լուրեր տարածելուն: «Ես ուրախ եմ տեսնել, որ նա վերադառնում է ողջ և առողջ», - գրել է Թրամփը Թվիթերի իր էջում: Հրապարակմանը կից նա տեղադրել է լրատվական դաշտից գրառումն այն մասին, թե ինչպես Կիմ Չեն Ընը մասնակցեց ԿԺԴՀ-ում նոր գործարանի բացմանը: 

Ավելի վաղ Թրամփը հրաժարվել էր մեկնաբանել ԿԺԴՀ առաջնորդի վիճակը՝ սահմանափակվելով նրան միայն առողջություն մաղթելով:
Շաբաթ օրը հյուսիսկորեական ԶԼՄ-ները հաղորդել էին երկրի առաջնորդ Կիմ Չեն Ընի՝ վերջին 20 օրվա ընթացքում առաջին անգամ հանրության մեջ հայտնվելու մասին: Չնայած Հարավային Կորեայի, Ճապոնիայի և Արևմտյան ԶԼՄ-ներում շրջանառվող լուրերին, թե նա լրջորեն հիվանդ է, Կիմ Չեն Ընը լուսանկարում ժպիտներով և ուրախության ժեստերով զրուցում է իր ուղեկիցների հետ մայիսի 1-ին տեղի ունեցած գործարանի բացման միջոցառման ժամանակ: