Ալբերտ Մուշեղյանը՝ Հայկ Դեմոյանին. «Փոխարենը ձայնը կտրի և ամոթից գետինը մտնի..»

Ցեղասպանության թանգարան-ինստիտուտի տնօրեն Հայկ Դեմոյանի ռուսերեն լեզվով գրված ատենախոսությունը շարունակում է կրքեր բորբոքել։ Երեկ մի շարք մտավորականներ  հավաք են անցկացրել «Կենաց ծառ» մշակութային կենտրոնում, որտեղ քննարկել և քննադատել են Դեմոյանի ատենախոսությունը: Հավաքի մասնակիցներից և ակտիվ քննադատողներից է եղել նաև գրականագետ և թարգմանիչ Ալբերտ Մուշեղյանը, ում հետ էլ զրուցեց Lurer.com-ը։

Վերջինս  մեկ անգամ ևս հայտարարեց, որ ատենախոսության մեջ տեղ են գտել լեզվական և իմաստային բազմաթիվ «անմտություններ»։

«Էջեր կան, որոնցում նույնիսկ 15-20 կոպիտ ուղղագրական և քերականական սխալ կա։  Եթե աշակերտին 8 սխալի համար երկուս ենք նշանակում և զրկում ատեստատից, այստեղ ամեն էջում 2 անգամ ավելի այդպիսի սխալներ կան»-ասաց Ալբերտ Մուշեղյանը։

«Փոխարենը ձայնը կտրի և ամոթից գետինը մտնի, Հայկ Դեմոյանը Ֆեյսբուքում գրում է.«ո՞վ է այդ Ա. Մուշեղյանը, միջակ կարողությունների տեր գրականագետ,  որ մտել է պատմության բոստանը և տրորում է». իբր թե ինքը պատմաբան է՝ ես էլ մտել եմ պատմության բոստանը։ Այսինքն, լինելով պետական պաշտոնյա, նա պատմության ոլորտի մասին խոսում է «բոստանով», սա է նրա մակարդակը»,-ավելացրեց մեր զրուցակիցը։

Lurer.com-ի այն հարցին, թե ինչ սխալների մասին է խոսքը, պատմաբանը օրինակ բերեց. «ասում է «քրդական հարց», Թուրքիան պետք է անհրաժեշտորեն քայլեր կատարի՝ չեզոքացնելու քրդական ռադիլաստիկական շարժումը։ Դա ի՞նչ ցուցում է  Թուրքիային, երբ  քրդերն այնտեղ հայերի նկատմամբ բարյացակամ վերաբերմունք ունեն, Դիարբեքուրում եկեղեցի են վերանորոգում, Մեջլիսում հայկական հարցն են բարձրացնում։ Եվ հանկարծ ատենախոսություն է գրվում հայի կողմից, որում ուղղակի ցուցում է տրվում Թուրքիային՝ ոչնչացնել քրդերին։ Փաստորեն Հայաստանի ցեղասպանության թանգարանի տնօրենը հօգուտ Թուրքիայի կոչեր է անում։ Սա աններելի է»,- հավելեց  Ալբերտ Մուշեղյանը։