ՍԴ իրավական դիրքորոշումների կատարումը սահմանադրական պարտավորություն է. Գալյան

Արդարադատության նախարար Սրբուհի Գալյանը ելույթ է ունեցել «Պետական իշխանության մարմինների և քաղհասարակության դերը Սահմանադրական դատարանի որոշումների կատարման հարցում» խորագրով միջոցառմանը։ Այս մասին տեղեկացնում են ՀՀ արդարադատության նախարարությունից:

Նախարարը նշել է, որ Սահմանադրական դատարանի (ՍԴ) իրավական դիրքորոշումները առանցքային նշանակություն ունեն ՀՀ իրավական համակարգում՝ հանդիսանալով Սահմանադրության պաշտոնական մեկնաբանություն և սահմանադրական նորմերի կիրառման պարտադիր ուղենիշ։

Ըստ նախարարի՝ ՍԴ դիրքորոշումները կարևոր դեր են խաղում իշխանությունների փոխզսպումների և հակակշիռների համակարգում՝

սահմանելով քաղաքական որոշումների սահմանադրական թույլատրելիության շրջանակը,

կանխելով իշխանության հնարավոր գերազանցումը։

Սրբուհի Գալյանը շեշտել է, որ ՍԴ իրավական դիրքորոշումների կատարումը քաղաքական նպատակահարմարության հարց չէ, այլ՝ սահմանադրական պարտավորություն։

Օրենսդիր իշխանությունը պարտավոր է՝

վերացնել ՍԴ կողմից Սահմանադրությանը հակասող ճանաչված կարգավորումները,

նոր օրենսդրական նախաձեռնությունների ընթացքում հաշվի առնել ՍԴ ձևավորած սահմանադրաիրավական չափորոշիչները։

Գործադիր իշխանությունը պարտավոր է ապահովել ՍԴ որոշումների գործնական իրականացումը՝

ենթաօրենսդրական ակտերի,

պետական քաղաքականության,

կիրառական մեխանիզմների միջոցով։

Նախարարը նշել է, որ արդեն ձևավորված պրակտիկա է, ըստ որի՝ վարչապետի աշխատակազմը իր լիազորությունների շրջանակում վերահսկում է ՍԴ որոշումների կատարման գործընթացը գործադիր իշխանության կողմից։

Մասնավորապես, ՍԴ յուրաքանչյուր որոշումից հետո, որով նորմատիվ ակտը ամբողջությամբ կամ մասամբ ճանաչվում է Սահմանադրությանը հակասող և անվավեր, կամ սահմանվում է դրա ուժը կորցնելու հետաձգված ժամկետ, Վարչապետի աշխատակազմը հետևում է, որպեսզի համապատասխան ոլորտի պետական մարմինը հնարավորինս սեղմ ժամկետներում հանդես գա օրենսդրական նախաձեռնությամբ։

Այդ նախաձեռնություններով Ազգային ժողովին ներկայացվում են ՍԴ որոշմամբ արձանագրված խնդիրները կարգավորող օրենսդրական փոփոխությունների փաթեթները։