«Սանիթեք»-ն ընդդեմ Հայաստանի պահանջ կներկայացնի

«Սանիթեք» ընկերությունը հայտարարություն է տարածել՝ հայտնելով, որ ընդդեմ Հայաստանի պահանջ է ներկայացնելու Ներդրումային վեճերի կարգավորման միջազգային կենտրոն (ICSID դատարան) իր ներդրումների արժեքը վերականգնելու խնդրանքով:

«Արմենպրես»-ի փոխանցմամբ՝ ընկերությունը հիշեցնում է շուրջ երկու տարի ընկերության և բաժնետերերի  նկատմամբ քրեական հետապնդումների մասին՝ նշելով, որ քրեական գործերը չեն դադարեցվել:

Հայտարարության մեջ նշված է, որ Երևանի քաղաքապետի հանձնարարությամբ Երևանի քաղաքապետարանն իրականացրել է  «Սանիթեք ընկերությունների» խմբի հետ կնքված պայմանագրերի լուծման գործընթաց՝ նպատակ հետապնդելով փոխանցել այդ պայմանագրերը, այդ թվում նաև՝ «Սանիթեքի»  գույքը Քաղաքապետարանին պատկանող ընկերությանը։ «Այս գործողությունների հետևանքով «Սանիթեք ընկերությունների»  խումբը ստիպված է եղել դադարեցնել գործունեությունը և գնալ սնանկացման, ինչը, իհարկե, հանգեցրել է խիստ բացասական հետևանքների ընկերության բաժնետերերի համար»,- ասված է հայտարարության մեջ:

Նշվում է, որ «Սանիթեք ընկերությունների» խումբը բազմիցս դիմել է գործող իշխանություններին բանակցային գործընթացի վերադառնալու վերաբերյալ՝ հայտնելով լրացուցիչ ներդրումներ կատարելու իր պատրաստակամությունը, սակայն որևէ արձագանք չի ստացվել և բոլոր դիմումներն ու համաձայնության գալու փորձերը մնացել են անհետևանք:

«Ամիսներ շարունակ «Սանիթեք»-ը հույս ուներ, որ կատաղի պատերազմի և կործանարար համավարակի համատեքստում Հայաստանի իշխանությունը կդրսևորի բարի կամք և իրավիճակը հարթելու կամահայտնություն կհայտնի:

Այնուամենայնիվ, կառավարությունը շարունակեց ցանկացած համագործակցություն մերժելու և ժխտելու իր գործելաոճը՝ չթողնելով «Սանիթեք»-ին  որևէ այլնտրանք, բացի սեղմ ժամկետներում Ներդրումային վեճերի կարգավորման միջազգային կենտրոն (ICSID դատարան) ընդդեմ Հայաստանի պահանջ ներկայացնելուց՝ իր ներդրումների արժեքը վերականգնելու խնդրանքով, որը կազմելու է տասնյակ միլիոն դոլարներ»,- ասվում է հայտարարության մեջ։