Կապանից դեպի մի շարք գյուղեր տանող ճանապարհների մի մասը կմնա ադրբեջանցիներին. քաղաքապետը հաստատեց՝ կրակոցներ են հնչել

Սյունիքի մարզի Կապան քաղաքից դեպի հարակից գյուղեր՝ Ագարակ, Սրաշեն, Ներքին Հանդ, Ճակատեն, Շիշկերտ, Շիկահող տանող ճանապարհահատվածների մի մասը մնում է թշնամու սահմանի մեջ։ Այս մասին ԼՈւՐԵՐ․com-ի հետ զրույցում ասաց Կապանի քաղաքապետ Գևորգ Փարսյանը՝ ընդգծելով, որ հայկական կողմին առաջարկվել է այլընտրանքային ճանապարհ։

Սակայն նա նշեց, որ որոշ գյուղեր տանող այլընտրանքային ճանապարհներ կան, որոշների դեպքում ՝ ոչ․ «Թեև դեպի Ագարակ տանող այլընտրանքային ճանապարհ կա, սակայն քանդված վիճակում է գտնվում և վերանորոգման կարիք ունի, քանի որ այդքան էլ երթևեկելի չէ։ Բայց, օրինակ, դեպի Ճակատեն գյուղ տանող այլ ճանապարհ չկա»,- ասաց Փարսյանը։

Ինչ վերաբերում է Ագարակ գյուղին, ապա նշեց, որ խոսքը Կապանին հարակից՝ քաղաքից արևելք գտնվող Ագարակ գյուղի, այլ ոչ Սյունիքի հարավային Ագարակ քաղաքի մասին է։

Խոսելով Գորիս-Կապան ավտոճանապարհի այն հատվածների մասին, որոնք անցնում են ադրբեջանական կողմին, Փարսյանը նշեց, որ այնտեղ հերթապահելու են ռուս և հայ սահմանապահները: 

Փարսյանը նաև հայտնեց, որ մարզում փակ է Մ2 մայրուղին, փողոց են դուրս եկել կապանցիները և քաջարանցիները։ Կառավարության դեկտեմբերի 17-ի նիստում փոխվարչապետ Ավինյանը հայտնել էր, որ սահմանապահ զորքերը երկրի սահմանների երկայնքով իրականացվում են տեղակայման աշխատանքներ։

Ինչպես հայտնի է, Սյունեցիները փակել էին Կապան-Երևան ավտոճանապարհը և պահանջում էին, որ պետությունը քայլեր ձեռնարկի սահմանների անվտանգության հարցով: Սյունիքի մի շարք դիրքերում թշնամու դիմաց կանգնած են գյուղացիներից կազմված կամավորական ջոկատներ: 

Քաղաքապետը հաստատեց տեղեկությունները, որ բողոքի ակցիայի ժամանակ Կապանում կրակոցներ են հնչել․ «Մեր կամավորներից մեկը, ցավոք սրտի, վիրավորվել է արկի պայթյունից։ Քանի որ շտապօգնությունն անցնում էր այդ ճանապարհով, իսկ ցույց անող քաղաքացիների մեքենաները խանգարում էին և պետք էր վիրավորին արագ հասցնել հիվանդանոց, դրա համար օդ կրակեցին, որ ճանապարհը բացեն, որ շտապօգնության մեքենան անցնի։ Սա է իրողությունը»,- պարզաբանեց Փարսյանը։ 

Սոնա Հարությունյան