Խաչատուր Սուքիասյանը 2008-ից այլևս օլիգարխ չի հանդիսանում. Վահագն Հովակիմյան

Սա խաղի կանոններ փոխել չի կոչվում, սա ընտրակարգի պարզեցում է: Իրականում ընդդիմությունը շատ լավ գիտի, որ ընտրություններից առաջ այս փուլում՝ համամասնականի անցնելուց բացի տեխնիկական փոփոխություններ են լինելու, այսպես ասեմ՝ իրենց կյանքը հեշտացնող փոփոխություններ են: Այս մասին այսօր Պետրոս Ղազարյանի հետ հարցազրույցի ժամանակ ասաց  «Իմ քայլը» խմբակցության պատգամավոր Վահագն Հովհակիմյանը՝ խոսելով արտահերթ ընտրությունների համար Ընտրական օրենսգրքում փոփոխություններ անելու որոշման մասին:

Հովակիմյանի խոսքով՝ այս պարագայում քանի որ վերջնական որոշում չկա, կարող  է անգամ ընդդիմությունն առաջարկներով հանդես գալ. «Մենք բաց ենք, մեզ համար կարևոր է, որ առաջիկա ընտրությունները լինեն ազատ, անկախ, թափանցիկ և անքննելի»:

Դիտարկմանը, թե ԼՀԿ ղեկավար Էդմոն Մարուքյանն ասում էր, թե համամասնական ընտրացանկով մարզերը դուրս կմնան ակտիվ ընտրական պայքարից, Հովակիմյանը պատասխանեց.  «Այդ փաստարկը տվյալ քաղաքական ուժի օգտին չի խոսի, դա նշանակում է, որ քաղաքական ուժն ի սկզբանե հայտարարում է՝ իմ ցուցակի առաջնային տեղերում Երևանի բնակիչներին եմ ընդգրկելու, այսինքն, մարզի բնակիչներին ցուցակի առաջին տասնյակում չի ընդգրկելու: Իրենք են իրենց ցուցակը կազմում, այդ դիտարկման մեջ ակամա խոստովանություն կա, որ մարզերի իրենց գործընկերներն անտեսված են լինելու»:

Դիտարկմանը, թե Արդարադատության նախկին նախարար Գևորգ Դանիելյանը հայտարարել էր, որ ընտրական բարեփոխումներն անիմաստ աչքակապություն են, իսկ այս փուլում՝ նաև ընտրական գործընթացը ձգձգելու լրացուցիչ պատրվակ և իշխանությունը ցանկանում է, որ հայտնի օլիգարխների հսկայական չափերի հասնող նվիրատվությունները ուղղվեն իրենց,  պատգամավորն արձագանքեց. «Մենք չունենք համակրող օլիգարխներ, եթե ասեք խոշոր գործարար, կասեմ՝ այո: Խաչատուր Սուքիասյանը 2008 թվականից այլևս օլիգարխ չի հանդիսանում, որովհետև նա իր կարողության զգալի մասը կորցրեց իր քաղաքական հայացքների համար, իսկ օլիգարխն իշխանությունն իր շահի համար օգտագործող գործարարն է»: