«Մեր մոտեցումներում որոշակի շտկումներ պիտի լինեն». ԱԽ քարտուղարը խուսափեց պատասխանել հարցին` արդյոք Թուրքիան մեզ համար թշնամի պետություն է, թե` ոչ

Ընդհանուր առմամբ ապաշրջափակումը պետք է լինի ոչ միայն Ադրբեջանի հետ, այլեւ ավելի լայն տարածաշրջանային մոտեցում պետք է ունենալ եւ կարծում ենք, որ այս պահին  այդ հնարավորությունները կան: Այս մասին Հանրային հեռուստաընկերության եթերում Պետրոս Ղազարյանին տված հարցազրույցի ընթացքում ասել է ՀՀ ԱԽ քարտուղար Արմեն Գրիգորյանը` խուսափելով ուղիղ պատասխանել հարցին, թե  անվտանգության  մեր կոնցեպտում Թուրքիան դիտվում է որպես թշնամի, հիմա ինչպիսին է մեր կոնցեպտը, ինչպես է տեսնում մեր փոխհարաբերությունները:

«Ռազմավարությունում ավելի լայն ձեւակերպումներ կան, բայց արցախյան երկրորդ պատերազմից հետո տարածաշրջանում ահագին մեծ փոփոխություններ են տեղի ունեցել եւ ապաշրջափակման գործընթաց է սկսվել նոյեմբերի 9-ից, որն ավելի ինտեսիվ փուլ է մտել հունվարի 11-ի Հայաստանի, ՌԴ-ի եւ Ադրբեջանի ղեկավարների հայտարարած փաստաթղթի շրջանակներում եւ ընդհանուր առմամբ ապաշրջափակումը պետք է լինի ոչ միայն Ադրբեջանի հետ, այլեւ ավելի լայն տարածաշրջանային մոտեցում պետք է ունենալ եւ կարծում ենք, որ այս պահին  այդ հնարավորությունները կան»,-ասաց նա:

Ճշտող հարցին, թե ինչից է ենթադրում, որ այդ հնարավորությունները կան, նա ասաց որ ուղիղ դիալոգ չկա, բայց երկու երկրների բարձրաստիճան պաշտոնյաների կողմից հրապարակային հայտարարություններ եղել են եւ դրա հնարավորությունը կա:

Պետրոս Ղազարյանի հարցին, թե արդյոք Թուրքիային համարում է թշնամի պետություն,  ԱԽ քարտուղարն ասաց.  «Նայեք, ես ասեցի, որ տարածաշրջանում շատ բաներ են փոխվել, մենք նոր էլ քննարկում էինք, որ հնարավորություն կա ընդհանուր տարածաշրջանի ապաշրջափակման ․․․ եթե մենք գնում ենք տարածաշրջանի ապաշրջափակման, ապա մեր մոտեցումներում որոշակի շտկումներ պիտի լինեն»։

Ճշգրտող հարցին, թե Թուրքիան էլ թշնամի պետություն չի, ԱԽ քարտուղարն ասաց. «Միանշանակ պնդել, թե որեւիցե վտանգ չի գալիս Թուրքիայից, սխալ կլինի, բայց ընդհանուր տարածաշրջանում ընթացող գործողությունները այլ հնարավորություններ են տալիս»: