ՀՀ-ն քննարկում է ՌԴ-ից ռուբլով գազ գնելու հարցը․ ՀԾԿՀ նախագահ

Կառավարությունում քննարկվում է Ռուսաստանից գազը ռուբլով գնելու հարցը, բայց ինչ զարգացում, ընթացք կա, չեմ կարող ասել: Այս մասին, այսօր՝ մարտի 28-ին, ԱԺ-ում լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Գարեգին Բաղրամյանը։

Նա նշեց, որ որպես հանձնաժողովի նախագահ և իր իրավասության շրջանակում  կգերադասեր, որ ավելի  հաստատուն փոխարժեքով առնեին գազը. «Կարելի է, իհարկե, զարգացնել գնային  քաղաքականությունը, ունենալ բանաձևային տեսք, ցանկացած  պահի փոխարժեքով ճշգրտված լինի, բայց քանի դեռ նման քայլի չենք գնացել, ունենում ենք տարեկան գին, ինչքան ավելի կայուն փոխարժեքով լինի գազը, այսինքն տարվա ավարտին  «Գազպրոմում» դրական կամ բացասական էֆեկտն այդ մասով  շատ ավելի քիչ կլինի և հաջորդ  սակագանի վերանայման ժամանակ ավելի քիչ գումար կփոխհատուցվի»,-ասաց նա՝ ճշտելով, որ ինքը պատասխանել է իր գերատեսչության տեսանկյունից, սակայն ասենք, ռուբլու մեծ հասքը Հայաստան դրական, թե բացասական կլինի երկրի համար, դա իր կողմից գնահատելիք հարցը չէ:

Ինչ վերաբերում է հարցին, թե ինչո՞ւ անհրաժեշտություն եղավ նման քննարկումների, Գարեգին Բաղրամյանն ասաց. «Չեմ կարող պատասխանել։ Քանի որ արժեզրկվել է ռուբլին, ենթադրում ենք, որ այդ մասով կարող ենք լրացուցիչ օգուտներ ունենալ, բայց  դա պետք է ավելի երկար ժամանակով գնահատել, կարող է դա  շատ կարճաժամկետ լինել։

Մեր մասով պետք է գնահատենք,  թե մեզ  համար որ փոխարժեքով է ավելի ձեռնտու գնել։ Այդ հարցին կդժվարանամ պատասխանել,  պետք է նայել ընդհանուր մակրոտնտեսական տեսանկյունից։ Կարծում եմ՝ պետք է լինի շահագրգիռ քննարկում էկոնոմիկայի նախարարության,  Կենտրոնական բանկի հետ, հասկանալու համար ռուբլու անցնելու սխեման մեզ համար ձեռնտու է, թե ոչ»։