Իտալիան մտադիր է շարունակել Հայաստանի հետ երկկողմ հարաբերությունների զարգացումը. տեղի ունեցավ ԱԳ նախարարների հանդիպումը

 Հայաստանը և Իտալիան գոհունակություն են հայտնում երկու երկրների միջև քաղաքական բարձր մակարդակի առկայության առնչությամբ և պատրաստակամություն հայտնում շարունակելու երկկողմ հարաբերությունների զարգացումը ընդհանուր հետաքրքրություն ներկայացնող բոլոր ոլորտներում: Այդ մասին Հայաստանի արտաքին գործերի նախարարությունում տեղի ունեցած հանդիպումից հետո հայտարարեցին Հայաստանի և Իտալիայի ԱԳ նախարարները:

«Հատկանշական է, որ Իտալիայի արտգործնախարարի այցը Հայաստան տեղի է ունենում Հայաստանի և Իտալիայի միջև դիվանագիտական հարաբերությունների հաստատման 30-ամյակի հոբելյանական տարում», - նկատեց ՀՀ արտաքին գործերի նախարար Արարատ Միրզոյանը՝ շեշտելով, որ դա նոր լիցք կհաղորդի երկու երկրների փոխշահավետ համագործակցությանը։

«Հայաստանը մեծապես կարևորում է Իտալիայի հետ երկկողմ հարաբերությունների շարունակական զարգացումը՝ հիմնված հարուստ ավանդույթների, հարուստ պատմական շփումների և ընդհանուր արժեքների և ժողովրդավարական սկզբունքների վրա: Այսօրվա քննարկումների ընթացքում մենք երկուստեք գոհունակություն ենք հայտնել Հայաստանի և Իտալիայի միջև քաղաքական երկխոսության բարձր մակարդակի և բարձրաստիճան փոխայցերի դրական դինամիկայի առնչությամբ», - տեղեկացրեց նախարար Միրզոյանը:

Իտալիայի արտգործնախարար Լուիջի դի Մայոն, որն առաջին անգամ է այցելում Հայաստան, իր հերթին շնորհակալություն հայտնեց ջերմ ընդունելության համար՝ նշելով, որ ինքն ուզում էր Հայաստան այցելությամբ նշել հայ-իտալական դիվանագիտական հարաբերությունների 30-ամյա տարեդարձը: Նաև նկատեց, որ Հայաստանը, ինչպես և Իտալիան, հարուստ պատմություն ունի:

Նախարարի խոսքով՝ Իտալիան մտադիր է շարունակել Հայաստանի Հանրապետության հետ երկկողմ հարաբերությունների զարգացումը ընդհանուր հետաքրքրություն ներկայացնող բոլոր ոլորտներում:

Բանակցությունների ընթացքում կողմերն արձանագրել են, որ տարեցտարի աճում է երկկողմ առևտրաշրջանառության և իտալական ներդրումների ծավալը Հայաստանում, և երկուստեք հավաստիացրել են, որ հետաքրքրված են էլ ավելի մեծացնելու ներդրումների և ապրանքաշրջանառության ծավալները:

«Հարկ եմ համարում նշել, որ թեև այս պատրաստակամությունը կա և առկա են կապերը, այնուամենայնիվ, տնտեսական ոլորտում առկա է նաև չօգտագործված հսկայական ներուժ, և մենք, ինչպես ասացի, այդ ներուժի իրացման գործում կարևորում ենք նաև հայ-իտալական միջկառավարական հանձնաժողովի աշխատանքը: Ի դեպ, պարոն նախարար, վերջին անգամ 2017 թվականին է հանձնաժողովը հավաքվել: Կարծում եմ, որ կարող ենք քայլեր ձեռնարկել նաև այս ուղղությամբ», - հավելեց Արարատ Միրզոյանը:

Իտալիայի արտաքին գործերի և միջազգային համագործակցության նախարար Լուիջի դի Մայոն ապրիլի 2-3-ը աշխատանքային այցով ժամանել է Հայաստան: Ապրիլի 3-ի առավոտյան նախարարը իրեն ուղեկցող պատվիրակության հետ միասին այցելեց Հայոց ցեղասպանության զոհերի հուշահամալիր: Այնուհետև ԱԳՆ-ում տեղի ունեցավ Հայաստանի և Իտալիայի ԱԳ նախարարների հանդիպումը, որին հետևել են մամուլի համար հայտարարությունները: Այցի շրջանակներում Լուիջի դի Մայոն հանդիպումներ կունենա նաև ՀՀ նախագահի, վարչապետի և ԱԺ նախագահի հետ: