Հրաչյա Սարգսյանն ու թիմը շարունակում են փիառվել հարկատուների գրպանի հաշվին

Երևանի քաղաքապետարանը, ի դեմս Հրաչյա Սարգսյանի, շարունակում է անխնա փիառվելու իր արշավը: Եվ դա պարզ է՝ առջևում քաղաքապետի ընտրություններն են, Տիգրան Ավինյանը թեև ընտրվեց փոխքաղաքապետ, այնուամենայնիվ պարզից էլ պարզ է, որ վերջինս դեռևս չունի վստահություն, որ ՔՊ քաղաքապետի թեկնածուն հենց ինքն է լինելու և դրանից էլ օգտվում է Հրաչյա Սարգսյանը, ով երբեք չի թաքցրել իր քաղաքապետական ամբիցիաները:

Դիցուք՝ քաղաքապետարանը իր ֆեյսբուքյան պաշտոնական էջով գովազդ է տեղադրել, որտեղ նշվում է, որ  Երևանի քաղաքապետ Հրաչյա Սարգսյանը հանդիպել է ՀՀ ԱԶԲ հայաստանյան գրասենյակի տնօրեն Պաոլո Սպանտիգատիի հետ: Խոսելով համատեղ իրականացվող ծրագրերի մասին՝ կողմերը նախանշել են առաջիկա անելիքները: Մասնավորապես, անդրադարձ է կատարվել Ջրվեժի ավտոբուսային հավաքակայանին, որտեղ նախատեսվում է կառուցել գազի և դիզելային վառելիքի լիցքավորման կայան, ավտոբուսների լվացման կայան, ինչպես նաև տեղադրել նոր ասֆալտբետոնե ծածկ:

Ակնհայտ է, որ Երևանի քաղաքապետարանը որոշել է հարկատուների իսկ գրպանի հաշվին զբաղվել քաղաքական դիվիդենտներ հավաքելով և Հրաչյա Սարգսյանի «տիտանական ջանքերը» և կատարած աշխատանքը այդ նույն հանրությանը հրամցնելով՝ գովազդի տեսքով: Ուշագրավ է, որ գովազդի տակ է դրել, ոչ թե այս կամ այն ծրագրի իրագործման մասին տեղեկությունը, այլ պարզապես, կարելի է ասել շարքային հանդիպման մասին ռելիզ, որից պարզ չի դառնում, թե ինչ է արդյունքում շահելու երևանցին:  Սա, ի դեպ, Հրաչյա Սարգսյանի փիառվելու առաջին դեպքը չէ, ամիսներ առաջ էլ վերջինս գովազդի տակ էր դրել ֆեյսբուքյան իր աձնական էջը՝ լայքեր և հետևորդներ հավաքելու նպատակով:

Պետք է նշենք, որ թեև քաղաքապետը և քաղաքապետարանն անխնա օգտագործում են հարկատուների գումարն ինքնագովազդվելու վրա՝ երևանցիները դեռևս չեն կարող գնահատել Հրաչյա Սարգսյանի և թիմի արգասաբեր աշխատանքի արդյունքները՝ դրանց ի սպառ բացակայության պատճառով...