Ադրբեջանն ու Իսրայելը քննարկել են ռազմական համագործակցության հարցեր

Ադրբեջանի պաշտպանության նախարար, գեներալ-գնդապետ Զաքիր Հասանովը հանդիպել է պաշտոնական այցով Ադրբեջանում գտնվող Իսրայելի պաշտպանության նախարար Բենիամին Գանցի գլխավորած պատվիրակությանը, հայտնում է Ադրբեջանի ՊՆ-ն։

Հանդիպման նախօրեին Իսրայելի պատվիրակությունն այցելել է այսպես կոչված՝ «Շեհիդների ծառուղի» և ծաղկեպսակ դրել «Անմար կրակի» հուշահամալիրում: 

Ողջունելով հյուրերին՝ Հասանովը նշել է երկկողմ գործընկերության բարձր մակարդակը, որը կարևոր դեր է խաղում ոչ միայն Ադրբեջանի և Իսրայելի զարգացման, այլև ողջ տարածաշրջանում «անվտանգության ապահովման» գործում։

Շնորհակալություն հայտնելով ջերմ ընդունելության համար՝ Իսրայելի պաշտպանության նախարարն ընդգծել է երկկողմ ռազմական համագործակցության հետագա զարգացման կարևորությունը։

Կողմերը քննարկել են ռազմական, ռազմատեխնիկական ոլորտներում համագործակցության զարգացման հեռանկարները, մասնագետների մակարդակով աշխատանքային հանդիպումների կազմակերպումը և փոխադարձ հետաքրքրություն ներկայացնող այլ հարցեր։