Զելենսկին «պատասխանել» է Մասկին

Ուկրանիայի նախագահ Վլադիմիր Զելենսկին ևս հարցում է իրականացրել իր Twitter-ում՝ գրելով, թե ո՞ր Իլոն Մասկն է դուր գալիս՝ նա, ով աջակցում է Ուկրաինային, թե նա, ով աջակցում է Ռուսաստանին։

Ավելի վաղ գործարար Իլոն Մասկը՝ աշխարհի ամենահարուստ մարդը, Twitter-ի իր էջում կիսվել էր իր ենթադրություններով, թե ինչ պայմաններով կարող է խաղաղություն կնքվել Ռուսաստանի և Ուկրաինայի միջև։

Մասկը նշել էր հնարավոր զինադադարի չորս հիմնական պարամետր.

1) Նոր քվեարկություն Ուկրաինայի օկուպացված շրջաններում ՄԱԿ-ի հսկողության ներքո. «Ռուսաստանը լքում է դրանք, եթե այդպիսին լինի բնակիչների ընտրությունը»:

2) Ղրիմը «պաշտոնապես» մնում է Ռուսաստանի կազմում, ինչպես եղել է 1783 թվականից («մինչև Խրուշչովի սխալը»,- գրել է Մասկը)։

3) Երաշխավորվում է ջրի մատակարարումը Ղրիմ։

4) Ուկրաինան մնում է չեզոք պետություն:

Մասկը ենթադրել էր, որ դա «ամենահավանական» սցենարն է: Նա նաև իր հետևորդներին հրավիրել էր աջակցել կամ հերքել իրեն։