Լը Պենը խոսել է հակառուսական պատժամիջոցների պատճառով ֆրանսիացիների «տառապանքների» մասին

Ֆրանսիայի Ազգային ժողովի Ազգային ասոցիացիայի խմբակցության ղեկավար Մարին Լը Պենը հայտարարել է, որ Եվրամիության կողմից Ռուսաստանի Դաշնության դեմ սահմանված պատժամիջոցները ոչ մի ազդեցություն չեն թողնում Ռուսաստանի վրա, սակայն պատժում են ֆրանսիացիներին։ Այս մասին նա ասել է BFM հեռուստաալիքի եթերում։

«Հակառուսական պատժամիջոցները չեն գործում, ավելին, դրանք հակաարդյունավետ են։ Այս պատժամիջոցների արդյունքում՝ Ռուսաստանի նավթի արտահանման եկամուտներն ավելացել են 40 միլիարդ եվրոյով: Այս պատժամիջոցները պատժում են ֆրանսիացիներին, որոնց հիմա դժվար ձմեռ է սպասվում, իսկ 2023-ին՝ գուցե նույնիսկ ավելի բարդ իրավիճակ»,- ասել է նա:

Ավելի վաղ Լը Պենը կարծիք էր հայտնել, որ էներգետիկ ոլորտում հակառուսական պատժամիջոցները անհեթեթ որոշում են, որը կարող է Ֆրանսիան հասցնել աղքատության։ Լը Պենի խոսքով՝ այս սահմանափակումները աղքատության լուրջ վտանգ են ներկայացնում ֆրանսիացիների համար՝ «էներգակիրների գների պայթյունավտանգ աճի պատճառով»։