ԵՄ-ն Ադրբեջանի հետ գազային համաձայնագիր է կնքել ոչ ի վնաս մարդու իրավունքների խնդիրների

Եվրոպական միության արտաքին քաղաքականության հարցերով բարձր ներկայացուցիչ Ժոզեպ Բորելը այս երեքշաբթի Եվրախորհրդարանում հայտարարել է, որ ԵՄ-ն Ադրբեջանի հետ էներգետիկ համաձայնագիր է կնքել էներգետիկ ճգնաժամի դժվարին պայմաններում գազի մատակարարումների ավելացման համար, բայց ոչ ի վնաս մարդու իրավունքների և ժողովրդավարության։

«Կարող եմ ձեզ վստահեցնել, որ էներգետիկայի այս համաձայնագիրը չի կնքվել ի վնաս մարդու իրավունքների կամ ժողովրդավարության խնդիրների հետ կապված բոլոր հարցերի, որոնք դրսևորվել են այդ երկրում»,- ասել է նա՝ մեկնաբանելով հայ-ադրբեջանական սահմանին և վերջին սրացումները, հաղորդում է Msn.com-ը։:

Բորելը քննադատել է Բաքվին հայկական տարածքի վրա հարձակվելու և Հայաստանի ներսում դիրքեր գրավելու համար։ «Սա անընդունելի է, այն չի հարգում միջազգայնորեն ճանաչված սահմանները»,- ընդգծել է նա՝ միաժամանակ խոստովանելով, որ «սարսափած» է՝ իմանալով ադրբեջանական զորքերի կողմից հայ զինվորների մահապատիժները ցուցադրող տեսանյութերի մասին։

Նա նաև ասել է, որ Թուրքիան «պետք է և կարող է» կառուցողական դեր խաղալ երկու երկրների միջև երկխոսության առաջխաղացման գործում՝ կոչ անելով նրան իր ազդեցությունը գործադրել Կովկասում իրավիճակը խաղաղեցնելու համար։