Կապիտուլացված ռեժիմն այլևս առաջարկ չունի հայ հանրությանը, Հայաստանին նոր ծրագրեր և պրոֆեսիոնալ կադրեր են պետք․ Արտակ Զաքարյան

Ամենայն Հայոց Կաթողիկոս Գարեգին Բ-ի և ՀՀ ու ԼՂՀ ներկայիս և նախկին նախագահների հանդիպումների ձևաչափը նոր-նոր մեկնարկած՝ այդ գործընթացը, կարծեք, որոշակի փակուղի մտավ․ Լևոն Տեր-Պետրոսյանը երկխոսությունը վիժեցնելու մեջ մեղադրեց Փաշինյանին և Քոչարյանին։ 

Այդուհանդերձ, Մայր Աթոռից հայտնել են, որ շարունակելու են այդ ֆորմատով քննարկումները։ 
Որքա՞ն հեռանկարային կարող է լինել ճանապարհային այդ քարտեզը՝ ներքաղաքական համախմբման տեսակետից։ Անդրադառնալով հարցին, ՀՀ ՊՆ նախկին փոխնախարար Արտակ Զաքարյանն ԼՈՒՐԵՐ․ com-ին ասաց․

«Վեհափառ Հայրապետի նախաձեռնությունը, կարծում եմ, մեր ժողովրդի համար Աստվածահաճո ձեռնարկ է լինելու: Հուսով  եմ, որ հնարավոր կլինի արդյունավետ և իրատեսական ելքեր գտնել: Հայաստան-Արցախ-Սփյուռք համախմբությունը եղել և մնում է այն միակ անկոտրում հենարանը, որը կարող է մեծ ներուժ հաղորդել Հայաստանի Հանրապետությանը` ստեղծված սպառնալիքները չեզոքացնելու, դիմակայելու և պրոբլեմներ հաղթահարելու համար»։

Քաղաքական գործչի պնդմամբ, կապիտուլացված ռեժիմն այլևս առաջարկ չունի հայ հանրությանը: 

«Խաբեություններն ու ռազմա-քաղաքական տվայտանքները չեն օգնում, կամ ավելի են խորացնում ճգնաժամը: Մեզ թարմ, նոր և իրատեսական ծրագրեր և պրոֆեսիոնալ կադրեր են անհրաժեշտ»,-շեշտեց Արտակ Զաքարյանը։

Արա Ալոյան