Վերջնագրերի լեզուն անընդունելի է Ռուսաստանի համար. Միշուստին

Ռուսաստանի վարչապետ Միխայիլ Միշուստինը հայտարարել է, որ երկիրը չի ընդունում վերջնագրերի լեզուն։ Այս մասին ՌԴ Նախարարների կաբինետի ղեկավարը հայտարարել է Երկրորդ Կասպյան տնտեսական ֆորումի լիագումար նիստում ունեցած ելույթի ժամանակ, փոխանցում է ՏԱՍՍ-ը։

Միշուստինի խոսքով՝ աշխարհում ոչ մի պետություն իրավունք չունի իր կամքը պարտադրել ուրիշներին։

«Վերջնագրերի լեզուն մեզ համար անընդունելի է։ Ոչ մի պետություն իրավունք չունի իր կամքը պարտադրել ուրիշներին, առավել ևս՝ դիմել ճնշման միջոցների, որոնք շոշափում են սովորական քաղաքացիների և մասնավոր բիզնեսի շահերը»,- իր ելույթի ժամանակ ասել է Միշուստինը։

Նա նաև հավելել է, որ Ռուսաստանի Դաշնությունը ստիպված է լինելու աշխատել բարդ՝ համաշխարհային տնտեսության տուրբուլենտության պայմաններում։

«Հավաքական Արևմուտքը, փորձելով պահպանել գոյություն ունեցող, հարմար աշխարհակարգը, աճող ճնշում է գործադրում այլ երկրների վրա»,- ասել է ռուս քաղաքական գործիչը։