Անկախ նրանից, թե ով է կանգնած Հունաստանի թիկունքում, մենք կանենք այն, ինչ անհրաժեշտ է. Հուլուսի Աքար

Թուրքիան կշարունակի ընդդիմանալ Հունաստանի կողմից Էգեյան ծովի ոչ ռազմական կարգավիճակ ունեցող կղզիներ զրահատեխնիկայի տեղափոխմանը։

Anadolu-ի փոխանցմամբ՝ այս մասին հայտարարել է Թուրքիայի ազգային պաշտպանության նախարար Հուլուսի Աքարը։

«Մենք ոչ մի քայլ, ոչ մի միլիմետր չենք նահանջի ինչպես գետնի վրա, այնպես էլ բանակցությունների սեղանի շուրջ»,- ասել է նա Անկարայի Պաշտպանության ազգային համալսարանում ունեցած ելույթի ժամանակ։

Նրա խոսքով՝ թուրքական կողմն անհրաժեշտ քայլեր է ձեռնարկում կղզիները ռազմականացնելու Աթենքի ծրագրերը կանխելու համար։

Գերատեսչության ղեկավարն ասել է, որ Թուրքիայի ռազմածովային և ռազմաօդային ուժերը «այդ հարցում հստակ հանձնարարականներ են ստացել»։ «Անկախ նրանից, թե ով է կանգնած նրանց թիկունքում (Հունաստանի – խմբ.), մենք վճռական ենք անելու այն, ինչ անհրաժեշտ է»,- զգուշացրել է նա։

Միաժամանակ նա նշել է, որ Անկարան դեռևս հանդես է գալիս Էգեյան ծովի տարածաշրջանում տարաձայնությունների խաղաղ և արդար կարգավորման օգտին։ «Մենք ձգտում ենք ապահովել, որ Էգեյան ծովի հարստությունը արդարացիորեն բաշխվի միջազգային իրավունքի և բարիդրացիական հարաբերությունների շրջանակներում»,- ասել է թուրք նախարարը։

Նախարարը նաև նշել է, որ թուրքական զինված ուժերը ձեռնարկել են բոլոր անհրաժեշտ նախազգուշական միջոցները և պատրաստ են հակահարված տալ Կիպրոսի ցանկացած սադրանքին՝  Կիպրոսի դեմ զենքի էմբարգոն չեղարկելու Վաշինգտոնի վերջին որոշման ֆոնին։