Էրդողանը կատակով Մակրոնին հրավիրել է միանալ Թյուրքական պետությունների կազմակերպությանը

Թուրքիայի նախագահ Թայիփ Էրդողանը Պրահայում Եվրոպական քաղաքական համայնքի առաջին հանդիպման շրջանակում ունեցած զրույցի ժամանակ իր ֆրանսիացի գործընկեր Էմանուել Մակրոնին կատակով առաջարկել է Ֆրանսիային միանալ Թյուրքական պետությունների կազմակերպություն, գրում է РИА Новости-ն։

Հանդիպման շրջանակում Էրդողանը զրուցել է Ադրբեջանի նախագահ Իլհամ Ալիևի, Հայաստանի վարչապետ Նիկոլ Փաշինյանի և Հունգարիայի վարչապետ Վիկտոր Օրբանի հետ։ Նրանց է միացել նաեւ Ֆրանսիայի ղեկավարը։

«Մակրոն, արի քեզ էլ տանենք»,- ասել է Էրդողանը Թյուրքական պետությունների կազմակերպության մասին զրույցի ժամանակ, հաղորդում է TRT Haber հեռուստաալիքը։

Եվրոպական քաղաքական համայնքի հայեցակարգը պատկանում է Ֆրանսիայի նախագահին։ Նա նշել է, որ Եվրոպային անհրաժեշտ է կառույց՝ զարգացնելու համագործակցությունը երկրների հետ, որոնց հետ նման սերտ ինտեգրումն անհնար է, ինչպես Եվրամիության ներսում՝ աշխարհաքաղաքական, էներգետիկ, ենթակառուցվածքների և տրանսպորտի ոլորտներում։

Գագաթնաժողովին մասնակցում են 44 երկրների ղեկավարներ։ Դրա հիմնական թեմաները կլինեն Ուկրաինայում ստեղծված իրավիճակը, էներգետիկ ճգնաժամը և տնտեսությունը։