Թուրքիայում մտադիր են ստեղծել Իրանի ադրբեջանցիների կառավարություն․ ովքե՞ր են ցանկանում մասնատել Իրանը

Իրանի ցույցերին զուգահեռ, մի քանի ակտիվիստներ հայտարարել են, որ մտադիր են Թուրքիայում ստեղծել այսպես կոչված Իրանի ադրբեջանցիների կառավարություն։ Ո՞վ կամ ովքեր են այս նախաձեռնության ետևում, ի՞նչ նպատակներ ունեն, և արդյո՞ք հեղափոխական ալիքը կհասնի Իրան։

«Նմանատիպ կառավարությունները բազմաթիվ են, օրինակ` Հարավային Ադրբեջանի աքսորյալ կառավարություն, բացի այդ, մի երկու հատ, կարծեմ, Բաքվում կա, դե իսկ Թուրքիայում էլ շատ բնական է, որ ստեղծվի այդպիսի կառավարություն, քանի որ տեղի է ունեցել այսպես կոչված Զանգեզուրի թուրքական հանրապետության ներկայացուցչության բացումը Թուրքիայում»,-ԼՈՒՐԵՐ․ com-ի հետ զրույցում նման տեսակետ հնչեցրեց իրանագետ Հարութ Արթին Առաքելյանը։

Նա չբացառեց, որ այդ ամենի ետևում հիմնականում Իսրայելը և Արևմուտքն են, որոնք, օգտվելով ստեղծված իրավիճակից, ցանկանում են մասնատել Իրանը։

«Իրանը շատ լավ հասկանում է դա և փորձում է դիմակայել այդ սպառնալիքներին։ Վերջերս ականատես եղանք քրդական շրջանների ռմբակոծություններին։ Օրերս Իրաքի Քրդստանի ներկայացուցիչը Թեհրանում հայտարարեց, որ իրենք անջատողական շարժումներին հեռացնելու են Իրաքի Քրդստանից»,-նշեց մեր զրուցակիցը։

Առաքելյանն ընդգծեց, որ այս ամենը նորություն չէ, պարզապես հիմա հակաիրանական ուժերը փորձում են օգտվել հերթական պատեհությունից և արդյունքի հասնել․

«Իրանում հեղափոխություն կլինի, թե՝ ոչ, առայժմ դժվար է ասել, ամեն դեպքում, կողմերը իրենց պայքարն են առաջ տանում։ Վերջին տասնամյակում Իրանում համանման ցույցեր եղել են․ 12 տարի առաջ օրինակ՝ ընտրություններից հետո, նման ակցիաներ եղան, հետո բենզինի թանկացման պատրվակով մեկ այլ բողոքի ալիք բարձրացավ և վերջինն արդեն այս օրերին է, որի նպատակն է՝ սասանել Իրանի անկախությունն ու տարածքային ամբողջականությունը։ Հիշեցնեմ նաև, որ դեռևս 2001 թ․ ԱՄՆ քարտեր հրապարակեց Միջին Արևելքի մասով, որտեղ Իրանը ներկայացված էր մասնատված»։

Արա Ալոյան